Gikan sa disco, patay human maligsi sa national highway sa Barangay Bahay, lungsod sa Sibonga, alas 4:15 sa kaadlawon sa Dominggo, Hunyo 4, 2023.

Si Jun Mark Ordeñiza, 22, taga Sitio Sacsac, Barangay Bahay, Sibonga namatay human nakaangkog grabing kadaot sa iyang ulo ug lawas.

Ang biktima nagmaniho nga walay lisensiya ug walay dokumento sa cannibalize nga motorsiklo, gikan sa disco sa ilang lugar.

Nadasmagan niya si Wendilyn Alipoyo, 38, dalaga ug taga Barangay Bagacay sa Sibonga, kinsa naangol nga nalandig sa tambalanan sa dakbayan sa Carcar.

Sa imbestigasyon ni Police Staff Sgt. Roland Napiere sa Sibonga Police Station, nasuta nga ang biktima gikan sa Brgy. Bahay Proper ug padulong mopauli sa ilang panimalay apan pag-abot sa nahitaboan si Alipoyo iyang nadasmagan.

Giingong kusog kaayo nakapadagan sa motorsiklo ang biktima hinungdan nga nawad-an siya og kontrol sa manubela.

Ang biktima nalagpot pipila ka metros ug nabunal iyang motorsiklo sa tunga sa karsada apan naligsan siya sa laing niagi nga padulong sa direksiyon sa habagatan sa lungsod sa Argao.

Ang biktima gidali sa pagdala sa Deiparine Community Hospital sa mga sakop sa Municipal Disaster Risk Reduction and Management Office (MDRRMO) apan gideklarar nga dead-on-arrival (DOA).

Ang babaye nga angol, gidala sa Carcar District Hospital.

Padayon pa nga gisubay sa kapulisan ang nakaligis sa biktima. (GPL)