Nung Makasandal ka king Ginu (If You're Leaning upon the Lord)

“Nganang sinabi ning Kakataskatasang Panginwan: Kanakung pakamalang Ardyun,

pauli ning e ka marirya Kanaku, idake Ku keka ining pekamiyanglit a belwan,

at neng abalu mu iti mikabus ka karing kasakitan ning makalabwad a kayatinan.

Ing belwang iti ya pin ing ari ning pamagaral, ing pekayanglit ding sablang anglit.

Iti ya ing pekabasal a belwan, at uli ning magkalub ya iting matulid a kamalitan ning sarili kapamilatan ning kapamaltutwan, iti ya ing kapantaspantasang pamanyamba.

Ala yang angga iti, at matula ya iting gagampanan.

Deng e tapat king paynturwan ning makatagulaling a kasuywan e da Ku dasnan,

O sinaul karing kasalang, nung e mibalik la king pamibait at pangamate keti

king panglabwad a karinan.

Kapamilatan Ku, king aske Kung makapampan, ing laganas a sikluban mililibutnan ya.

Ding sablang mabibye ati lu Kanaku., dapot ala Ku karela.

Makanyan man ding sablang melalang e la makasandal Kanaku.

Pagumasdan mu ing Kanakung kabal a pibandyan! Agya mang Aku ing manese

karing sablang mabibye, at agya mang ati Ku mu man Karin,

Aku pa mu rin ing kabud mung pagmulan ning pamaglalang.

Nung makananung ing anging masikan, lalabul ya nu man karin,

pane makasandal king pilatang e amalit, balwan mung antita la mu namang makasandal

ding sablang mabibye Kanaku. ”

~ Dalit ning Kakataskatasang Panginwan | Dangka 9: Sunis 1-6

(The Song of God, 9:1-6)

***

Ing kalayan metung yang pigkalub ning Ginu karing sablang kaladwan lakwas na karing ating isip at katuliran o itamung tau.

Ing lugud makayagpang ya king kalayan uling e ya malyaring akwa king sapilitan o king pilit ing lugud. E me malyaring pilitan o agyang takutan ing ninu man ba'na kamung luguran. Nung waring tutukan meng pataram o baril ing ninu man ba'na ka mung luguran–agawa nang luguran na kang tutwanan? Mekad nung e ya man papate keka, tangu ya man uli namu ning takut na keka uling pota paten me. Tumakut ya man—e na ka pa mu rin alugurang tutwanan. Kalako mu nung mang sakaling kilung me—mamulandit yang tumakas bang makarayu keka.

E la ditak ding “kasalpantayanan” a gagamit king “takut” bang makayagyag la karing aliwa, kesa king ituru da ing ka ayan bang aluguran yang tune ing Ginu. Ipanaral da ing alang-anggang parusa o ing mibansagang impyernus. Ing alang-anggang milalablab a api. Karin la kanu reng e manwala o tataluki king karelang aguman.

Apamatakutan da ka man at ayagyag king karelang kasalpantayanan, datang at datang mu rin ing aldo migising ka king katutwan a ing lugud at aliwa ing takut yang buri Nang ipagkalub tamu Kaya--king Kakataskatasang Ibpa.

Kaya ta magsandal. Kaya ta manalig at Kaya ta la ipagkalub ding isip, pusu at kaladwa at e ta panwalan a ing takut yang buri Nang damdaman tamu para Kaya. Lugud, e takut.

***

Dake Talabaldugan

⦁ Minalin – Lagyu ning balen kasiping ding Makabebe, Apalit, San Simun, Bakulud at Santo Tomas. English — Minalin town in Pampanga surrounded by the towns of Macabebe, Apalit, San Simon, Bacolor and Santo Tomas. Alimbawa king pamangamit: “Inyang malati ku sabi da reng mangatwa, deng tau kanu Minalin duling la ngan, e man pala tutu.”

⦁ minalinawan – melinawan. English — clarified or cleared up, explained well, expounded, elucidated, explicated. Alimbawa king pamangamit: “Alang makibalu keng kabaldugan ning sasabyan ning dayu, mayap namu minalinwan na ning abe nang makapagsalitang Kapampangan.”

⦁ minalino – linto alino, meyakit alino ning ninu o nanu man. English — someone or something created a shadow. Alimbawa king pamangamit: “Minalino ya keng gulut ning dalig a salamin ing aske ning e mu aisip-isip nung nanung bage linabas keng kilwal bale.”

***

DIPARAN, KASEBYAN at KABALDUGAN

Maralas dang sasabyan deng makatwa ing antini kanita lakwas na neng mag-Maleldo:

“Mumuli ne king isa” Deng anak da reng makatwa o kakilala na sasabyan de ini. Dindam mu ne ini, abe?

Kabaldugan: Mangabaldugan a ing metung a taung matwa na babalik na ing isip nang anak at gugulyan ne. Mapangalingwan ya pa potang mumuna, kaybat ing gawi na miyayalilan king ugaling anak o mekad bingut pa pin. Pati pin piblas na babalik keng piblas anak. Pati gayak na at pamanyagsag king bwak na pang-anak. Makukulta ne isip at ing keraklan king pamangawan na manawang na uling matwa ya katawan dapot dapat anak ing kimut na.

***

MIKANLAPIT KABALDUGANG AMANU TAMU

1. sakyud – kimut a paylalam kaybat payangat, mengari king susungab a tau, ayup o asan.

2. salaksak – anti king sakyud, kimut a paylalam kaybat payangat, mengari king susungab a tau, ayup o asan.

3. kayud – mababo – kimut a paylalam kaybat payangat, mengari king kakayud buku o nanu mang bungang tanaman.

4. kudkud – – kimut a paylalam, mengari king kakyud king ungut a matwa o nanu mang masyas a bage lalasawan.

5. bungkal – – kimut a paylalam, mengari king susungab a tau, ayup o asan.

6. kulkul – pamipalalam king gabun o batu o nanu mang masyas a bage.

7. aun – anti mu naman king aun, pamipalalam king gabun o batu o nanu mang masyas a bage.

8. araru – mababo pamanaun kenggabun anting pamiyadya keng pamanasik lakwas na keng pale.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph