GIINGONG dunay mga kakulian diha sa affidavit hinungdan sa pagkalangan sa pagpasaka og mga kaso batok sa tulo ka mga gitudlong suspek sa kamatayon ni Vlanche Marie Bragas, kini suma sa hepe sa Davao City Police.
Sumala ni DCPO director Police Colonel Alberto Lupaz atol sa flag ceremony sa Camp Captain Domingo E Leonor sa San Pedro Street, Davao City, Lunes, Hunyo 5, 2023, nga dunay mga kakulian ang affidavit busa ilaha kining gihan-ay og ayo aron plastar ang pagpasaka og kaso.
“I would like to announce that in relation to the SITG (Special Investigation Task Group) Bragas we have initiated the filing of cases starting Friday last week, but unfortunately we are not able to finish it because there are a little concern of some of the affidavits,” sulti ni Police Colonel Lupaz.
Sumpay niini, gipasalig ni Police Colonel Lupaz nga ipasaka ang kaso.
“Hopefully today (June 5)... we will be able to file a case against suspects of rape slay of Vlanche Bragas,” ingon ni Lupaz.
Sa pagsuwat ning balita, wala pa nakapasaka og kaso batok sa tulo ka mga suspek.
Gikataho nga si Lupaz niingon nga tulo ka mga suspek ang ilang giila kalabot sa kaso - ang ongbak driver, ang ongbak nga pasahero, ug usa ka tawo nga nakit-an duol sa balay ni Bragas, apan, walay mga detalye nga gibutyag.
Atol usab sa flag ceremony, ang hepe sa kapulisan niingon nga padayon nilang gipangita ang ongbak.
“‘Di pa natin nakikita but we have received reports [that the ongbak is currently] somewhere there in Calinan,” saysay ni Lupaz.
Una niini, si Davao City First District Representative Paolo “Pulong” Duterte mitanyag og P1 milyon nga reward niadtong makahatag og impormasyon sa mga suspek.
“Ang katong P1 million mao na tong gi-declare na reward money sa maka-solve, dili sa makakita lang sa ongbak,” ingon ni DCPO spokesperson Police Major Catherine dela Rey atol sa radio interview, Hunyo 5, sa Davao City Disaster Radio.
Sa Facebook post sa DCPO, ang suspek nakit-an nga nagmaneho o nagsakay sa yellow nga trimotor nga adunay label nga "CRC" sticker sa wala nga bahin sa fender, usa ka sticker sa kalabera nga adunay pula nga luha ug mga sungay nga nagbitay sa ilawom sa tuo nga kilid nga suga, ug usa ka chain necklace nga nagbitay sa atubangan.
Gidugang sa maong post nga sa makatudlo sa ongbak, mahimong mokontak sa Davao City Police Station hotline number 0998-598-7074 o 295-0119. (JPC, Ian Carl Espinosa)