GI-INAGURAHAN na ang satellite office sa Vice President ug Department of Education Secretary Sara Duterte sa Cotabato City nga personal niyang gitambongan niadtong Dominggo, Hunyo 4, 2023.
Tumong sa pagbukas niini nga mapaduol ang mga serbisyo ug tabang gikan sa nasudnong kagamhanan, ilabi na buhatan sa Bise Presidente.
Sa iyang pamulong, gipasalamatan ni VP Sara ang mga nahimong instrumento sa pagpatuman ug pagtukod sa "satellite office" sa dakbayan sa Cotabato.
Matud niya nga importante nga mabati sa katawhan nga adunay gobyerno nga nagpakabana alang sa katawhan.
Suwerte ang Cotabato City nga napili nga tukoran sa ika-9 nga satellite office sa VP nga nagtanyag og nagkalain-laing tabang ug social services sa katawhan.
Mahimong makatabang ang buhatan kung magkinahanglan ang katawhan og medical ug burial assistance.
Anaa usab ang "healthy food trucks" nga nagtumong sa pagsulbad sa malnutrisyon sa mga estudyante ug isip "augmentation resource" panahon sa kalamidad.
Gihangyo ni VP Sara ang Bangsamoro Government nga suportahan ang iyang mga programa sama sa programa sa SARAP ug pagbaBAGO campaign.
Sa laing bahin, gipahibalo ni Mayor Bruce Matabalao nga estratehiko kaayo ang nahimutangan sa satellite office sa VP sanglit ang dakbayan maoy trade center sa Bangsamoro Autonomous Region in Muslim Mindanao (BARMM).