KIDAPAWAN CITY -- Gimando ni Bise Presidente Sara Duterte ngadto sa kapulisan sa Pikit Municipal Police Station nga palawman pa ang imbestigasyon sa pagpamusil sa duha ka magtutudlo aron nga makab-ot ang hustisya.

Usa kanila ang namatay samtang ang laing usa samaran sa maong hitabo.

Ang bise presidente nagpaabot og pahisubo ug personal nga gibisita ang haya sa usa ka magtutudlo alas 11sa buntag, Dominggo, Hunyo 4, 2023, sa Pikit, Cotabato Province.

Kaluoy ang gibati ni Duterte sa kamatayon ni Joel Reformado nga head teacher sa Damalasak Elementary School sa Barangay Damalasak, Pikit, Cotabato Province nga giingong gipamusil, kauban ang co-teacher nga si Elton John Lapined kinsa giingong grabe sab nga naangol.

Kahinumdoman nga sakay ang mga biktima sa usa ka motorsiklo ug pauli na unta sa ilang gipuy-an sa dihang gipamusil gamit ang kalibre .45 nga pistola sa riding in tandem suspects.

Pulos nadala sa Cruzado Medical Hospital ang duha ka magtutudlo apan nabugtoan sa kinabuhi si Reformado samtang gibalhin sa dakong balay tambalanan sa Kidapawan City si Lapined.

Miduyog ang Bise Presidente sa paglubong ni Reformado uban ang mga magtutudlo sa Pikit.

Mitunol og tabang si Duterte ngadto sa pamilya ni Reformado ug sa naangol nga si Lapined. (PR)