Gibaslan sa Miami Heat ang Denver Nuggets 111-108 sa game 2 aron itabla nga 1-1 ang best-of-seven-series sa NBA Finals sa Hunyo 5, 2023.
Si Gabe Vincent nipakatap og 23 puntos samtang sila si Jimmy Butler ug Bam Adebayo niamot og 21 puntos matag usa aron agakon ang Heat sa pagsakmit sa kadaugan sa balwarte sa Nuggets.
Si Max Strus niiskor og 14 ug si Duncan Robinson adunay 10 alang sa Heat, nga adunay dako nga labaw sa first quarter apan nabiyaan og 15 puntos sa second quarter sa wala pa sila nakabawi sa fourth quarter.
Gipildi sa Miami ang Denver, 36-25, sa final period aron papason ang 8 puntos nga labaw paingon sa fourth quarter.
Si Nikola Jokic niiskor og 41 puntos, diin katapusan sa iyang puntos gikan sa four-footer nga itsa sa nahabiling 36 segundos aron ingkiton ang labaw ngadto na lang sa 3 puntos.
Gipili sa Denver nga dili i-foul ang nisunod nga opensiba sa Miami. Si Butler nasipyat sa tira sa tres ug si Jamal Murray nasipyat sa iyang three-pointer sa buzzer.
Si Murray adunay 18 puntos ug 10 ka assists alang sa Denver, samtang si Aaron Gordon adunay 12 puntos ug si Bruce Brown niiskor og 11.
Si Jokic adunay upat ka assists, nga mas ubos sa 14 nga iyang natala sa Game 1.
WA NAKAUYON
Si Nuggets coach Michael Malone niingon human sa duwa nga wala siya nakadayeg sa performance sa iyang pipila ka mga magduduwa.
“This is the NBA finals and we’re talking about effort. That’s a huge concern of mine. You guys probably though I was making up some kind of storyline after Game 1 when I said we didn’t play well, but we didn’t play well. This is not the preseason or the regular season, this is the NBA finals ... Miami came in here and outworked us,” paghulagway ni Malone.
Si Strus, kinsa 0-for 10 sa Game 1, adunay upat ka three-pointers sa unang quarter sa Game 2.
Si Butler nihimo og jumper sa nahabiling 4:56 minutos sa opening quarter aron ibutang ang Miami sa 21-10 nga score apan pagkapupos sa 1st quarter, tulo na lang ang labaw sa Heat human ni rally ang Nuggets.
Gipildi sa Nuggets ang Miami, 32-11 sa sunod nga 9 ka minuto, nga naghimo sa double-digit nga biya ngadto sa double-digit nga labaw tungod sa three-point barrage.
Sa 70-segundos nga gidugayon sa sayong bahin sa ikaduhang kwarter, ang Denver nakakuha og upat ka tres – mas daghang puntos kay sa nakuha sa Miami sa tibuok siyam ka minuto nga gidugayon ug kini gikan nilang Bruce Brown, Jeff Green, Murray ug dayon ni Gordon.
Si Murray adunay lima ka sunodsunod nga puntos ug ang Denver naglabaw, 44-32, sa dihang nahuman ang second quarter.
Ang Heat nakahimo sa pagdikit ngadto sa 57-51 hangtod nga ilang nakuha ang momentum.
Wala tugoti sa Miami nga makalingkawas ang Denver ug nakakita og paagi aron makuha ang kadaugan sa fourth quarter. (PAC, AP)