Mananagat nga giingong nanigbas og iro samtang hubog gibunalbunala’g dos por dos sa silingan alas 5:55 sa hapon sa Dominggo, Hunyo 4, 2023 sa Isla Verde, Brgy. Bolinawan, dakbayan sa Carcar.

Ang suspek giingong nilaban sa iyang amahan nga giingong tigbason unta sa biktima.

Ang mga suspek giilang sila Si Rodrigo Daal, 62, traysikad driver ug anak nga si Christian Caballero, 20, estudyante.

Ang biktima giilang si Joaquin Cuico, 58, minyo, kinsa nabalian sa walang bukton.

Sila si PSSgt. Marjon Aledon ug Patrolman Louie Laña sa Carcar City Police Station daling nirespondi sa dapit human nitawag sa ilang buhatan si Brgy. Captain Michelle Gador alang sa police assistance tungod sa kagubot.

Nadakpan ang amahan ug anak samtang ang biktima gidali sa pagdala sa Carcar Provincial Hospital tungod sa mga samad ug bun-og.

Si Daal nga nahinabi sa Superbalita Cebu nagkanayon nga nilaban siya sa iro nga si Bakang kinsa gitigbas ni Cuico nga nagmaoy tungod sa kahubog.

Si Bakang gihiktan sulod sa koral sa panimalay sa iyang bayaw. Ang asawa ni Daal maoy gaatiman sa iro.

“Hubog ni siya biktima nagdala’g pinuti, iyang gitripingan ang iro nga si Bakang. Luoy kaayo si Bakang kay gitigbas, daghang samad sa buko-buko,” pasangil ni Daal.

Naluoy siya busa iyang gibadlong ang biktima, kinsa nasuko, nikuha’g bato ug gilabay si Daal hinungdan sa iyang pagkatumba.

Tigbason unta siya apan ang iyang anak nga si Christian nitabang, nikuha og dos-por-dos, gibunalbunalan ang biktima. Si Daal nipadayag nga kanunay magmaoy ang biktima. (GPL)