Ang kabaskog ni six-time MVP June Mar Fajardo i-evaluate sa sunod semana aron masuta kon angay na ba siyang moduwa sa San Miguel Beer sa PBA On Tour ug sa Philippine men’s basketball team alang sa Fiba World Cup.
Si Coach Jorge Galent niingon nga ang 6-foot-11 center andam na alang sa laing hugna sa pagsusi sa MCL injury nga iyang nahiaguman atol sa East Asia Super League (EASL) Champions Week nga nagpugong kaniya sa paglihok sulod na sa kapin duha ka mga buwan.
“June Mar will get assessed on the 15th (June) to find out about his injury. But definitely, he’s improving,” matod ni Galent.
Ang San Miguel nidaog batok sa Barangay Ginebra 90-78 niadtong Dominggo aron inaton ang ilang standing 2-1 sa PBA On Tour.
Si Fajardo, 33, padayong nagpa-rehab sa iyang angol bisan og kaduha na siya nagpraktis sa team.
“Half-court lang. Pero when it comes to full court, rest na siya but he goes to practice and he shoots around, which is good,” dugang ni Galent nga unang napatik sa Spin.ph.
Wala hinuon mosulti si Gallent kon kanus-a andam ang Cebuano cager nga moduwa sa San Miguel sa PBA pre-season games.
Apan nanghinaot siya nga mahatagan og go signal si Fajardo nga makaduwa sa labing daling panahon sanglit mas dako pa nga misyon ang nagpaabot sa University of Cebu alum sa Gilas Pilipinas.
“We’ll find out if ilang weeks, another two weeks, another three (weeks). But I hope another two weeks so that he can also help the Gilas team,” dugang sa SMB head coach.
Ang Gilas Pilipinas anaa na sa proseso sa pagpangandam alang sa ilang training camp alang sa World Cup nga gitakda sa ulahing bahin sa Agusto hangtod sa sayong bahin sa Septiyembre nga i-co-host sa Pilipinas, Japan, ug Indonesia. (PAC)