Namatay ang usa ka lalaki nga nadasmag sa trailer truck samtang nagmotorsiklo paingon sa trabahoan niadtong Hunyo 3, Sabado, sa Ouano Avenue, North Reclamation Area, Barangay Subangdaku, dakbayan sa Mandaue.
Giila ang biktima nga si Julieto Gasper, Jr., 26, taga Ibabao, Cordova, Cebu.
Ang drayber sa trak giila nga si Rey Calang, 42, taga Compostela, Cebu.
Gidala sa Mandaue City Hospital si Gasper aron matambalan apan gideklarar nga dead on arrival.
Ang assistant investigator sa insidente, Police Master Sergeant Melvin Leones sa Traffic Enforcement Unit (TEU) nitug-an sa mga tigbalita sa Lunes, Hunyo 5 nga mga alas 9 sa buntag nahitabo ang aksidente.
Ang biktima padulong sa iyang trabahoan alang sa usa ka meeting sa dakbayan sa Sugbo.
Gituohan nga wala dayon kabantay ang biktima sa trak nga niliko padulong sa Reclamation Area hinungdan nga siya nabangga.
“Dili pud mi kakuan og naglumba, medyo dako iyang motor, medyo kusog iyang motor kaysa sa ubang mga sakyanan. Kato uban niyang gi overtake-an mao to kusog siya og padagan. Mao to naalanganin siya padagan, nya ningliko pud tung wheeler truck. So pag-abot niya, naapsan jud niya ang lubot sa trailer, katung hait btaw nya murag stepboard sa trailer. Didto siya nasangit,” pasabot ni Leones.
Matod pa ni Leones nga sa ilang imbestigasyon, si Calang niingon nga wala siya masayod sa hitabo.
Nakurat na lang siya dihang gisundan siya sa mga polis ug niingon nga duna siyay naigo.
Si Calang anaa pa sa kustodiya sa Mandaue City Police Office (MCPO) Station 2 nga nagpaabot sa tukmang kaso nga ipasaka batok kaniya.
Samtang, wala pa mahusay ang pamilya sa biktima ug tag-iya sa trak. Apan si Leones niingon nga niadtong Sabado niabot sa ilang buhatan ang tag-iya sa trak ug andam moabaga sa galastohan sa pagpalubong.
AKSIDENTE
Si Hyl Retuya, legal head sa Traffic Enforcement Agency of Mandaue (TEAM), niingon sa Lunes, Hunyo 5 nga daghang mga aksidente na sa maong lugar.
Matod pa ni Retuya nga tungod kay adunay ordinansa ang Dakbayan nga mag-regulate sa speed limit, ang Team nagtuon kon mopalit ba sila og kagamitan sa pag-monitor sa speed sa sakyanan.
Matod niya nga plano sa Dakbayan nga mopalit og speed guns karong tuiga o sa sunod tuig aron gamiton.
Siya nipasabot nga mahal kaayo kini nga kahimanan ug dili pa nila matino kon pila ang kantidad.
Niini, iyang giawhag ang mga tigmotorsiklo sa pagtuman sa speed limit sa karsada.
Sa Marso 2023, mokabat sa 891 ka mga kaso ang natala sa mga aksidente sa kadalanan, kadaghanan naglambigit og motorsiklo. (HIC)