Ang mga barangay kapitan sa Cebu City niingon nga ang Hunyo 12 nga ultimatum nga gihatag ni Cebu City Mayor Mike Rama sa presensya sa mga basura ug street-dwellers sa palibot sa siyudad “lisod” pa nga tumanon sa hingpit.
Si Victor Buendia, barangay kapitan sa Labangon, nitug-an sa SunStar sa Lunes, Hunyo 5, 2023 nga samtang naghimo sila og mga lakang aron makab-ot ang tumong, siya niingon nga nagkinahanglan pa sila og suporta sa City Hall ilabi na sa street dwellers.
“It’s difficult to do, we need the city hall’s support for the authority to remove the street dwellers along the streets,” matod ni Buendia.
Dugang pa niya nga nisamot kalisod ang ilang pagkolekta sa basura sanglit kausa ra sila mangolekta sa usa ka adlaw, sukwahi sa ideal nga kaduha o katulo matag adlaw.
Alang kang Aileen Guardo, barangay kapitan sa Sambag 1, kinahanglan nga adunay kabalhinan ang street dwellers human makita nga bisag kapila na nila masikop, mamalik ra gyud sila.
“Regarding sa mga street dwellers, nagkinahanglan gyud ta og relocation site para nila kay ang atong mga paningkamot mawad-an og kapuslanan kay magsige lang sila og balik, ug kadaghanan kanila dili man taga-barangay,” matod ni Guardo.
Ang pamaagi sa pagkolekta sa basura sa Sambag 1 hagit usab, matod ni Guardo. Ang regular nga pagkolekta usahay mapakyas ug dili makaato sa gidaghanon sa basura sa lugar.
Matod niya nga duha ka biyahe ang ilang pagpangolekta og basura matag adlaw, apan tungod sa kalayuon sa labayanan ubanan sa sa trapiko, usa ra ka biyahe sagad mahimo sa usa ka adlaw.
Ang usa ka biyahe usahay dili maka-accommodate sa mga basura gikan sa lainlaing institusyon sa barangay, matod ni Guardo.
Iyang gitumbok ang City Central School, Abellana National School, ug bisan ang mga boarding house sa maong dapit.
Sa Barangay San Nicolas Proper, ilang gihimo ang ilang makaya ilabi na sa pagkolekta sa basura.
Si Clifford Ninal, barangay kapitan sa Barangay San Nicolas, niingon nga bisan og regular ang ilang pagpangolekta, ang hagit mao ang pagbalik-balik sa mga garbage truck paingon sa Brgy. Binaliw, ang dumping area sa mga basura. (EKV)