Kinahanglang ibalhin ang Cebu International Port gawas sa dakbayan sa Sugbo, subay sa plano sa Cebu City Government nga palambuon ang waterfront area niini, apil na ang pagtukod sa creative district.
Ang 14 ka ektarya nga dunggoanan himuong lugar nga maka-accommodate sa internasyonal nga mga turista nga molawig paingon sa Sugbo.
Apan si Cebu City Vice Mayor Raymond Alvin Garcia, sa usa ka inrteview sa Dominggo, Hunyo 4, 2023, niingon nga nagkinahanglan pa kini og mas taas nga panahon tungod kay ang maong lakang nagkinahanglan sa pag-amendar sa Republic Act 7621 o ang Cebu Port Authority Charter.
Kini naglatid nga ang CPA maoy gimandoan sa pagdumala, pag-operate, pagmentinar, pagpalambo sa mga pantalan ug pasilidad sa pantalan sa tibuok probinsya.
Si Garcia, sa privilege speech atol sa regular session niadtong Mayo 17, 2023, niingon nga kinahanglang bawion sa Siyudad ang bahin sa baybayon nga giokupar sa CPA aron matuman ang plano sa Siyudad sa pagpalambo sa waterfront area.
“We will transform that port area into a place where we can welcome international tourists to the City of Cebu. Mao na nga papahawaon na nato ang CPA diha,” matod ni Garcia sa iyang pagpamulong.
Si Garcia niingon nga ang mga domestic nga pantalan mahimong magpabilin, apan ang mga pantalan diin ang mga dagkong trak nga nagdala og container vans paingon ug gikan kinahanglang ibalhin aron mawagtang ang trapiko sa metro.
Si Garcia niingon nga ang Siyudad makasugod sa pag-establisar sa creative district bisan kon ang mga pantalan dili pa mabalhin, ug nidugang nga ilang gilantaw ang Block 27 sa North Reclamation Area isip unang lugar nga himuong creative district. (EKV)