Namatay diha-diha ang 33 anyos nga backrider human nalabay gikan sa ilang gisakyang motorsiklo sa iyang kaluha niadtong Dominggo sa gabii kay nasulod sa giwang sa gitrabahong national highway sa Barangay Jubay, lungsod sa Liloan, amihanang Sugbo.

Si Patrolman Jicliff Guilaran, traffic investigator sa Liloan Police Station, niila sa namatay nga si Reymond Dayday Sepe.

Angol usab ug padayon nga giobserbahan ang iyang kaluha nga si Richard, taga Barangay Tabla, lungsod sa Liloan.

Ang duha nag-angkasay sa motorsiklo subay sa dalan sa Barangay Jubay, dihang na-shot ang ligid niini sa giwang sa karsada nga niresulta sa pagkatumba ug pagkalabay ni Reymond.

Ang tunga sa dalan walay warning device o timailhan aron makita unta dayon sa mga motorista panahon sa kagabhion ang bahin sa karsada nga wa makongkreto.

Samtang ang hepe sa Liloan Police Station nga si Police Major Eric Gingoyon niawhag sa mga motorista nga mag-amping sa pagmaneho aron malayo sa disgrasya. (Hulagway sa Liloan Police Station)