Basurang makuyaw ug hospital waste treatment facility tukoron karong buwana sulod sa Mactan Economic Zone (MEZ) 1 sa dakbayan sa Lapu-Lapu.
Kining P150 milyunes nga state-of-the-art nga investment maoy hatdan sa tanang mga basura nga gikan sa Mactan Export Zone (MEZ) ug mga basura sa mga tambalanan sa lalawigan sa Sugbo.
Ang nakabutang nga pasilidad sa MEZ 1 mopaubos sa gasto sa mga locator sa ilang paglabay sa basura ug treatment fees ug labaw sa tanan, makapauswag sa ilang pagtuman sa mga balaod sa kinaiyahan.
Ang peligroso nga basura mao ang waste nga adunay dako o potensyal nga hulga sa kahimsog sa publiko o sa kinaiyahan.
Ang Development Bank of the Philippines nga gidumala sa kagamhanan, sa usa ka kasabutan uban sa Pacific Mactan Renewable Environmental Systems Inc. (PMRESI), mohatag og 70 porsyento sa pundo samtang ang naulahi maoy moabaga sa 30 porsyento nga equity. Ang loan gikan sa DBP datahan sulod sa pito ka tuig.
Ang PMRESI mao ang lokal nga katugbang sa Eneco WTE Pacific Inc. nga nakabase sa Canada, ang mohatag sa teknolohiya. Ang Eneco ang nipasulod sa Tops sa Pilipinas.
Ang PMRESI maoy motukod, modumala ug mo-operate sa treatment facility kansang konstruksyon magsugod karong buwana ug mahuman sa Septiyembre ning tuiga.
Ang 2,000 square-meter treatment facility magpakita og containerized Thermal Oxidation Process System (Tops) nga naggamit sa thermal gasification/oxidation process aron madugta ang carbon-based nga mga sangkap sa basura ug makunhuran ang gidaghanon niini sa 97 porsyento.
Kon hingpit nang magamit, ang pasilidad makaakomodar kini og hangtod sa 15 ka tonelada kada adlaw sa industriyal, peligrosong basura, ug bisan sa basura sa ospital. Kini nga proyekto mao ang bugtong treatment, tipiganan ug labayanan nga pasilidad sulod sa MEZ 1.
“With this innovative project, MEZ locators will no longer have to dispose of their hazardous waste on their own, which marks the commencement of a smart waste management and energy recovery system for the locators. This is in support of the Philippine Economic Zone Authority’s greening of ecozones program, reinforcing enhancement of the locators’ compliance to environmental laws,” matod ni Jesus Jayme Jr., presidente sa PMRESI.
Sa pagkakaron, ang mga delikado nga basura sa mga locator sa MEZ gikolekta ug giatiman sa dili MEZ nga third party nga mga kompaniya. Ang mga locator nagbayad niini nga mga kompaniya sa matag higayon nga sila mosulod ug mogawas sa ecozone, ug uban pang bayad. (KOC)