Kapulisan sa dakbayan sa Sugbo nakig-alayon sa Bureau of Jail Management and Penology (BJMP) nga nagdumala Cebu City Jail human usa nila ka dinakpan sa miaging semana nangangkong hitman, nitug-an nga usa ka drug personality nga nabilanggo nisugo kaniya kon kinsa ang iyang pamatyon bugti sa P50,000 nga suhol.

Ang suspek nga si John Bryan Fernandez giingong niangkon sa miaging semana nga siya ang responsabli sa tulo ka mga kaso sa pagpamusil sa dakbayan sa Sugbo.

Ang katapusan niyang gipatay mao kadtong manindahay nga babaye sa sementeryo sa Brgy. Carreta.

Giangkon niya nga naa sa sulod sa Cebu City Jail ang iyang amo nga nalambigit sa ilegal nga drugas nga nimando kaniya, pinaagi sa usa usab ka drug personality nga taga Lapu-Lapu, isip middleman, nga nadakpan na usab sa kapulisan.

MGA NGAN

Sa back tracking sa Cebu City Police Office, matod ni Police Colonel Ireneo Dalogdog sa interbyu sa mga tigbalita sa Lunes, Hunyo 5, nga duna nay mga ngalan nga gipangtug-an si Fernandez.

Ila kining pangsusihon unsa ka tinuod uban sa BJMP.

Gibutyag ni Dalogdog nga dili lang sa dakbayan sa Sugbo nag operate si Fernandez ug duna siyay mga kauban nga hitman.

Moigo usab sila sa mga silingang dakbayan ug kalungsuran ilabi na kadtong dunay dakong utang sa drugas sa ilang amo.

Giingong niangkon ang suspek nga siya ang nipatay sa usa ka tawo sa Brgy. Inayawan nga giingong nakautang og usa ka kilong shabu.

Sa dihang gipaninglan, wala kini nakabayad hinungdan nga gipapatay bugti sa P50,000.

“Ang operation niya dili lang sa Cebu City kay mapansin nato. Naa na puy shooting incident nga naa sa outside Cebu City, pero kon tan-awon nimo ang background more on related gihapon sa illegal drugs,” matod ni Dalogdog.

Tungod sa gibutyag ni Fernandez, nakig alayon ang kapulisan sa BJMP ilabi na nga dunay ngalan nga gibutyag ang suspek.

Tinguha nila nga dili na maka gamit og cellular phone ang mga person deprived of liberty (PDL) aron maputol na ang nagpadayon nga ilegal nga negusyo sa mga drug personality nga naa na sa city jail.