Human nakadaog og tulo ka mga titulo sa katapusang upat ka mga torneyo, ang Moalboal women’s volleyball team mosuway og langkat sa ilang ikaupat nga kampyonato sa Carcar City.
Ang Moalboal nga maoy hara sa Taytay Open, Malabuyoc Open ug Lambug Open, makigtigi batok sa 20 ka teams sa 1st Lorena Mae Tabora Carcar Open, apil ang mga squad gikan sa University of San Jose-Recoletos, Cebu Institute of Technology ug Southwestern University.
Sa pagpangulo nila ni coach Dexter Tapales ug team captain Crisha Omagac, ang ilang team malaumon sa laing finals stint sa torneyo.
Ang team nga nitapos usab sa ikaduha sa Basdiot Open, bag-ohay lang nihatag og courtesy call kang Moalboal Mayor Inocentes Cabaron, kinsa maoy nigamit sa team aron mangulo sa iyang summer sports program nga gikatakdang sugdan sunod buwan.
Ang ubang mga miyembro sa team mao sila si Ivony Love Templado, Coleen Glover, Juliana Gabales, Jessa Gabunada, Jinelyn Nocos, Jay Ann Tapales, Jasmine Omagac, Jilyn Rivera, Aronez Nerona, Jishin Omagac, Christine Rebano, Alliana Tangkay, Rhaj Tarongoy, ug Shellce Dela Rita. (PAC)