GIKANAYON sa Special Investigation Task Group (SITG) Bragas nga ang mga suspek sa pagpatay kang architect Vlanche Marie Bragas naimpluwensiyahan sa illegal nga druga.
“Definitely magkasama sila, mga suspect natin, related sila sa drugs, because if you are a normal person you cannot do a normal thing, itong pagpatay at pag-rape hindi ito normal,” matud ni National Bureau of Investigation-Davao Region (NBI-Davao) Regional Director lawyer Archie Albao sa press conference nga gihimo sa Davao City Police Office (DCPO) headquarters gabii niadtong Hunyo 5, 2023.
Giila sa SITG Bragas ang mga suspek nga sila si Dennis Panzan, Kent Lawrence Espinosa, ug Renato “Empoy” Bayansao, ug ang John Doe.
Gibutyag sa task group nga nailhan ang upat ka mga suspek sa pagpatay sa architect niadtong Mayo 17, base sa “collected statements of witnesses and pieces of evidence collected.”
Si Bansayao nadakpan niadtong Mayo 28 ug naa karon sa kustodiya sa Philippine Drug Enforcement Agency-Davao Region (PDEA-Davao).
“One of the suspects is being arrested for drugs and there was a positive testing of the accused for illegal drugs,” dugang ni Albao.
Giingong si Espinosa gitaho nga nawala niadtong Mayo 27, ug si Panzan, kinsa tindero og karne, namatay sa samtang giluwas sa Talomo Police Station niadtong Mayo 29.
Subay sa "Link Analysis Diagram" nga gipresentar ni Calinan Police Station commander Police Major Niel Vistar, ang saksi nga si “Michael” nag-ila ni Espinosa pinaagi sa tattoo sa iyang tuong kamot. Ang saksi, sa iyang affidavit, nagbutyag nga si Bragas nisakay uban ni Espinosa sa ongbak.
Laing saksi nga ginganlan og “Joan”, kinsa hapit maligsan sa samang ongbak mga 10:42 sa gabii niadtong Mayo 16, nagkatinubagay sa drayber niini. Iyang giila ang drayber nga si Renato Bayansao human makita ang iyang hulagway sa balita ug nag-viral nga posts.
Si Joan nailang regular nga kustomer ni Dennis Roy Panzan sa iyang meat shop nga naa sa Megaville Street sa Calinan, kon diin si Panzan giingong nagsumbag kang Bragas una si John Doe misumbag sab sa tiyan sa biktima.
Human mawad-i og panimuot, ang biktima nakita ni “Joan” gibitad sa mga suspek ngadto sa ongbak una sila mituyok ug mituratoy og padagan sa crime scene nga maoy nakuha sa CCTV footage mga alas 10:46 sa gabii. Apan si “Joan” nanumpa nga wala niya mamatikdi si Espinosa nga uban sa mga suspek atol sa maong higayon.
Base sa imbestigasyon, gituohan nga ang paglugos ug pagpatay sa biktima nahitabo sa Barangay Dacudao, Calinan District kon asa siya nakitang patay.
Gikanayon sa NBI-Davao regional director nga duna silay “strong evidence” nga nagsuporta sa giingong buhat sa mga suspek.
“Mabigat po ang kaso (the case is strong), we have strong (sets of) evidence, we have witnesses, we have the CCTV, ‘yan po ang mga evidence na (they are) really involved in the commission of the offense,” pagtataw ni Albao.
Nagpasaka ang SITG Bragas og kasong lugos uban ang homicide hapon niadtong Hunyo 5 didto sa City Prosecutor’s Office.
Samtang gibutyag sa task group nga wala pa nila makita ang nawala nga ongbak ug ang laing usa ka wala pa mailhing suspek sa kamatayon ni Bragas.
“We will also pursue na suspect na John Doe at ‘yung nawalang ongbak na motor, may mga lead na tayong inaano,” pasalig ni Davao City Police Office city director Alberto Lupaz sa press conference, Hunyo 5.
Sa dihang gipangutana bahin sa posibleng "leads" nga magtumbok sa gihiposan sa ongbak, nibalibad si Lupaz sa pagsulti og dugang niini.
Ila pa sab nga giila ang usa ka John Doe, kinsa giingong nagsumbag sa tiyan ni Bragas nga gibutyag ni “Joan” sa iyang gipanumpaan nga affidavit.
Gitahong dunay kapin sa 30 ka managsama nga makitang ongbaks nga sama sa gigamit sa mga suspek, apan gipaneguro ni Lupaz nga bisan kon ang ongbak nga ilang gipangita ilisan og pintura, ila gihapon kining maila.
Hinuon, giklaro sa city director nga ang kaso “is not yet closed” sa kamatayon ni Bragas.
“Ang gusto natin na ma-find out ‘yung material evidence... ‘yung motor na yan na ma-recover, pati ma-identify namin ang John Doe na ‘yan,” dugang pahayag ni Lupaz.