Dear Papa Joe,
Tawga lang ko sa ngalan nga Leonora, 27 years old, may bana ug kasado. May mga anak mi nga tulo ka buok. Kining akong bana nisu’d ni siya og bisyo ug napasagdan na lang mi ani niya. Iya sang pamilya kay konsintedor. Ako pa ang bati kay nagsige kuno ko og pangaway hangtod nga wa na ko ulia sa akong bana. Tungod kay panimalay man sa iyang ginikanan ang among gipuy-an nga gitagana para amoa, ako na ang nibiya.
Hangtod nga niabot ang tuig nga wa na siya nagparamdam nako. Tawo ra ko natintal ug nimabdos sa laing lalaki. Pagkahibawo niya kay iya ta ming ikiha pero wala na man sad ang lalaki kay gigamit ra sad ang akong kahuyang. Karon namugos siya nga makigbalik ug human sa tulo ka buwan nisugot ko pero wa na mi sa ila puyo, nia mi sa amoa. Wa na siya magbisyo pero mao lagi magselos ug inawong niya nako ang akong mga sayop. Unsa may buhaton ko? Tambagi ako.
LEONORA
Leonora,
Di man sad nato ma blame ang lalaki, Day, kay syempre minyo mo ug insulto sa iyang part, labi na kon siya wa sad manikas nimo pero sa bisyo ra. Gawas kon ang iyang bisyo pamabaye. Di man na overnight nga mapapas dayon pero ingna na lang siya nga kon tinud-anay siyang nahigugma pa nimo, paningkamuti nga mag usab siya kay kon mao ra gihapon ang iyang tan-aw nimo, mas maayo pa magbuwag mo. Kay ngano? Mas luoy ang inyong mga anak nga magdako sa kagubot. Basin pa diay mausab siya ug ayaw kalimot pagpangayo og pasaylo sa Ginoo kay nakasala gyud ka sa kaminyuon.
PAPA JOE