Alegre na ang pulitika sa labing ubos nga ang-ang sa gambalay sa kagamhanan bisan sa Oktubre 30, 2023 pa mahitabo ang Barangay and Sangguniang Kabataan Elections (BSKEs) 2023.
Ang Commission on Elections (Comelec) unang nitakda sa BSKEs sa Disyembre 5, 2022 apan gisibog sa naasoy nga petsa human naapiki tungod sa pandemiya sa Covid-19.
Nipawagas na ang Comelec sa election period sugod karong Hulyo 3 hangtod sa Nobiyembre 14, uban sa filing sa Certificate of Candidacy (COC) gikan sa Hulyo 3 ngadto sa 7.
Ning panahona makita na ang diskarte sa mga nangambisyon nga mahimong opisyal ug ang nagpaluyo kanila nga mga pulitiko sa dakbayan o kalungsoran .
Ug usa sa komon nga hitabo basta mag-angat ang eleksiyon mao ang pagtumaw sa mini nga salapi nga de papel, alang kaha ipangbayad sa mga botante?
Usa sa kamatuoran ning ulahi mao ang nasakmit sa Criminal Investigation and Detection Group (CIDG) Visayas nga mobalor og P55,500 nga mini nga kwarta gikan sa usa ka 50 anyos nga lalaki atol sa entrapment operation sa Sitio Mahayahay, Barangay Pasil, dakbayan sa Sugbo, alas 5:50 sa hapon sa Lunes, Hunyo 5, 2023.
Ang suspek taga Barangay Poblacion, dakbayan sa Lapu-Lapu.
Ang CIDG nakadawat og impormasyon labot sa ilegal nga kalihukan sa suspek ug gipanid-an. Human sa pipila ka semana, ilang gilusad ang buy-bust uban sa Payments and Currency Investigation Group sa Bangko Sentral ng Pilipinas ug Regional Intelligence Unit 7.
Malampuson nga nadakpan ang suspek ug nakuhaan og 41 ka mini nga P500 bill, 35 ka mini nga P1,000 bill ug usa ka tinuod nga P1,000 nga gigamit isip buy bust money.
Hinuon, dili kita makaseguro kon dunay kalambigitan sa pagkasakmit sa mini nga kuwartang de papel, apan silaw pa sa pahak nga usa kini sa mga diskarte sa nangaging eleksiyon, ang mini nga salapi bugti sa mini nga botos.
Nganong dunay mailad pa?