Ang mga punerarya ug mga parlor sa dakbayan dili na makalimod ni bisan kinsa sa ilang serbisyo tungod sa wala pagbayad sa bayronon ug uban pang galastuhan.
Kini human napasar ang landmark legislation sa Cebu City Council pinaagi sa giduso ni Councilor Rey M. Gealon.
Matod pa ni Gealon nga kining maong ordinansa gihimo ilabina alang sa mga kabos ug mga way ikasarang, nga matod niya nga ang mga kabos gihikawan sa ilang dignidad bisan sa ilang kamatayon tungod sa ilang kahimtang.
“Para sa mga kabos intawn ni nga nahikawan og dignidad, bisag sa ilang katapusan, tungod sa ilang pagka kabus,” matod ni Gealon.
Ubos sa maong ordinansa, ang mga funeral establishment kinahanglang mokompleto sa ilang serbisyo, gikan sa pagbilar hangtod sa paglubong sa mga patay.
Ang pamilya o sunod nga kabanay pakuhaon og promissory note nga naglangkob sa wala pa mabayri nga mga obligasyon, apan ang establisemento dili makapugong sa paglubong o makalangan pa niini.
Gidugang usab ni Gealon nga ang mga serbisyo sa punerarya dinhi sa dakbayan kinahanglan nga mohatag sa ilang serbisyo sanglit ang mga kabos nakaseguro sa P10,000 nga funeral assistance gikan sa City Government.
Kinahanglang kuhaon sa mga kabos ang ilang certificate of indigency gikan sa ilang barangay ug ang opisyal nga death certificate sa namatay aron i-file ang ilang hinabang nga ihatag sa City Government.
“We cannot allow indignity and ignominy to befall upon our dead brethren, as well as to those they leave behind, for reasons of poverty and penury. The refusal, denial or witholding of funeral service consequently brings about that. Besides, those engaged in the funeral business are not without legal recourse. They may seek the issuance of a promissory note with guarantee,” dugang ni Gealon.
Ang ordinansa naglatid nga ang dili pagtuman niini adunay silot nga unom ka buwan nga pagkabilanggo nga dili molapas sa usa ka tuig, ug multa nga P5,000, depende sa pagbuot sa korte.
Ang pagdumili sa pagtuman mahimong moresulta usab sa pagkansela o pagbakwi sa business ug sanitary permit nga giisyu sa Dakbayan sa Sugbo.