Peke nga kuwarta, gibaligya

Tampo
Tampo

Nasakmit sa mga sakop sa Operation and Detection Section sa Criminal Investigation and Detection Group Regional Field Unit (CIDG-RFU 7) ang mobalor og P55,500 nga peke nga kwarta gikan sa usa ka 50 anyos nga lalaki atol sa entrapment operation sa Sitio Mahayahay, Brgy. Pasil, dakbayan sa Sugbo alas 5:50 sa Lunes sa hapon, Hunyo 5, 2023.

Ang suspek nga gidakop sa CIDG 7 mao si Mario Mangila Pazon, ulitawo, taga Barangay Poblacion, dakbayan sa Lapu-Lapu.

Ang CIDG nakadawat og impormasyon gikan sa mga residente sa Pasil labot sa ilegal nga kalihukan ni Pazon nga mamaligya og peke nga kwarta, busa gipaubos dayon nila sa surveillance.

Human makompirmar ang kasayuran, nakig-alayon dayon sila sa Payments and Currency Investigation Group sa Bangko Sentral ng Pilipinas ug Regional Intelligence Unit 7 alang sa ilusad nga operation.

Malampuson nga nadakpan ang suspek ug nakuha ang 41 ka fake 500 peso bill, 35 ka fake 1,000 peso bill ug usa ka tinuod nga P1,000 nga maoy gigamit isip buy-bust money.

Ibaligya sa suspek ang tag 500 peso bill sa tag P25 ug tag P50 ang fake 1,000 peso bill.

Matod ni Police Corporal Jan Cyril Agonia, investigator on case, hugot nga gihimakak ni Pazon nga siya ang naghimo sa maong mga peke nga kwarta sanglit igo lang siya nga niangkat.

“Ang iyang giingon nga naa daw tighimo ana pero wala pa siya motug-an kon kinsa. Mao na among giimbestigar pa, Sir, kon mosulti ba gyud ni siya kon kinsa nang iyang giingon nga tag-iya sa fake nga kwarta,” matod ni Agonia.

Giangkon ni Pazon nga nakabaligya na siya og mga peke nga kwarta sa Pasil tungod kay daghan ang mopalit niini apan dili pa siya dugay nga namaligya niini.

Kasagaran sa mga mabiktima, sigun ni Agonia, mao kadtong mga sidewalk vendor nga dili na mosusi sa madawat nga kwarta kon tinuod ba kini o dili.

“Luoy kaayo ang mapalitan ani nga kwarta, Sir, kana bitaw mga vendor nga idiretso ra sa bulsa ang kwarta nya wala kahibalo nga fake diay. Luoy kaayo na sila,” dugang ni Agonia.

Kalapasan sa Article 168 sa Revised Penal Code kun illegal possession and use of false treasury or bank notes in relation sa Article 166 paragraph 1 sa Revised Penal Code ang atubangong kaso sa suspek.

Tungod sa maong kalampusan, ang kapulisan sa Central Visayas hugot karon sa ilang pagbantay aron di makalusot ang fake nga mga kwarta ilabi na nga nagkaduol na ang eleksyon sa barangay tungod sa posibilidad nga gamiton sa pagpamalit og botos.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph