Gideklarar sa doktor nga dead-on-arrival si Barangay Councilor Antonio Caballes Fernandez, 64, taga-Barangay Mangyan, Lungsod sa Sibonga, Sugbo human naaksidente.

Gisungag ang iyang gimaneho nga Blue Motorstar motorcycle (plate no. 171GOS) sa gikasugat nga Mitsubishi L300 sa Martes sa alas 2:45 sa hapon, Hunyo 6, 2023 sa National Highway, Sityo Lagang, Brgy. Ocaña, dakbayan sa Carcar.

Gitanggong si Virgilio Paraiso Manguilimutan, Jr., 28, ulitawo, taga Lower Mohon, Talisay City, drayber sa Mitsubishi L300.

Si Police Staff Sgt Dennis Cabajar, imbestigador sa traffic sa Carcar Police Station nga nahinabi sa Superbalita Cebu, nagkanayon ang biktima mopauli sa ilang balay sa Brgy. Mangyan, Sibonga.

Samtang si Manguilimutan gikan sa lungsod sa Argao nga gihulagway nga kusog nga nakapadagan sa L300 van padulong sa dakbayan sa Talisay, ni-overtake sa nag-una nga traysikol hinungdan nikawat sa pikas lane diin nagsubay ang biktima.

“Killer highway ning dapita daghang nadisgrasya. Hilan kaayo ni sukad pa sa una daghang namatay,” matod ni Cabajar nga nihulagway sa maong dalan nga tanos, sagad sa mga motorista mopabulhot og padagan. (GPL)