Gihatagan na og pagtugot sa Provincial Economic Enterprise Council ang Topline Group of Companies nga mao nay modumala sa pagpalambo sa Cebu North Bus Terminal (CNBT).
Kini human malampuson niining napresentar ang proposal sa himuong pag-upgrade ug improvements sa pasilidad sa naasoy nga terminal subay sa taho sa Sugbo News, web based media platform sa Office of the Governor.
Ang Topline adunay plano nga mopabutang og canopy ug mga bangko sa terminal sa kasamtangang nahimutangan niini sa open parking space sa SM City Cebu.
Si Topline president and chief executive officer Erik Lim nagkanayon nga humanon nila ang maong pagpalambo sulod sa 60 ka adlaw.
Gawas niini, gitan-aw usab sa Topline ang pagpatuman sa automated ticketing system pinaagi sa Suroy-Suroy Sugbo Card alang sa mas paspas ug mas hapsay nga passenger traffic sa CNBT.
Ang maong paagi gipatuman na sa Cebu South Bus Terminal (CSBT). Aron mapatuman ang proyekto, gikatakdang moumol og usa ka memorandum of agreement ang Cebu Provincial Government, Topline ug ang SM City Cebu alang sa maong katuyoan.