Moasdang na ang Golden State Warriors sa balwarte sa Boston Celtics karong alas 9:00 sa buntag, Hunyo 9, 2022 (RP time) alang sa Game 3 sa National Basketball Association (NBA) Finals.
Nagtabla ang duha ka mga kampo, 1-1, sa nag-unang duha ka mga duwa sa series nga gipahigayon sa bag-ong panimalay sa Warriors nga mao ang Chase Center sa San Francisco.
Sa pag-ataki sa Warriors sa TD Garden, bawon nila ang dakong kadasig nga ilang nakuha gikan sa ilang dominasyon sa Game 2, 107-88.
Gikinahanglan kini sa Warriors aron ipang-alkontra sa seguradong maglanoglanog nga abiba sa mga sumosunod sa Celtics.
“We always know how to find a way to win games no matter what style it is, high scoring, low scoring, defensive battle, shootout, whatever it is,” matod sa lider sa Warriors nga si Stephen Curry.
Ang Celtics mohamag ning sangkaa nga nagpilit sa ilang alimpatakan nga kinahanglang limitahan ang ilang turnovers nga maoy dakong sa hinungdan sa dako nilang kapildihan sa Game 2.
Gawas niini, andam sab ang Celtics nga moparang sa agresibo ug pisikal nga duwa sa Warriors. (AP)