Lain na sab nga kinabuhi ang nakalas sa aksidente niadtong Sabado, Hunyo 3, nga naglambigit og motorsiklo. Nabangga ang motorsiklo sa usa ka van nga niliko sa eskina sa North Reclamation Area habig sa dakbayan sa Mandaue.
Dunay mga netizen nga ni-comment nga posibleng naglumba ang mga drayber sa motorsiklo apan tagna-tagna lang sab ni. Mas duol tingali ang giingon nga kusog ang dagan kay kon basehan ang video nga gi-upload sa social media, naunhan ang tanang mga sakyanan nga nag-una unta.
Ang motorsiklo lahi sa four-wheeled, makadasmag o maoy nadasmagan, maangol gihapon ang sakay, drayber man o angkas. Pila na man ang nangaangol ug nangamatay tungod kay nakadasmag og iro sa karsada? Sama niadtong magtiayon nga nangamatay kay nakadasmag og iro sa Transcentral Highway (TCH).
Way makapanalipod sa lawas sa nagmotorsiklo, di sama four-wheeled nga mga sakyanan. Busa unya’g katumba, makaangkon og mga samad ug hayan bali sa kabukogan.
Apan bisan pa niini, daghan gihapon sa mga nagmotorsiklo maggukdanay, makapadagan maorag way laing sakyanan sa kadalanan.
Ang nahitaboan niadtong Sabado gihulagway sa traffic agency sa Mandaue nga “accident prone,” nagpasabot nga daghan nang mga aksidente ang nahitabo sa dapit. Busa, angay mopamenor aron duna pay higayon nga makahunong kon dunay laing sakyanan nga makababag sa lane ug di mabangga.
Kon ikaw magmaneho ipadaplin ang garbo naunhan ka sa gagmay nga motorsiklo. Ayaw padala sa garbo. Kon nagdali ka man, di gihapon ni katarungan ang kusog kaayong pagpadagan.
Ibutang kanunay sa huna-huna nga kuyaw ang karsada tungod sa kadaghan sa mga sakyanan ug pedestrian. Makaigo ug ikaw ang naigo alkanse ka gihapon.
Labaw sa tanan, ibutang kanunay sa imong huna-huna nga duna kay pamilya nga naghuwat sa imong pag-uli. Busa, mag-amping kanunay. Ride safe.