LAMBERTO G. CEBALLOS
Ilaya, Cawayan, Dalaguete, Cebu
ANIA karon si Ellen sulod ning mabugnawng lawak sa motel nga air-con. Kuyog niya si Alan, iyang pamanhunon. Gitakda na ang ilang kasal nianang sunod buwan. Dili unta siya mosugot nga dad-on siya ni Alan dinhi, apan nakumbinsir siya niini dihang nanan-aw silag sine didto sa CC Mall kaganina. “Unsa may imong kahadlokan, Love, nga kaslon na man ta sunod buwan?” matod ni Alan. Apan gibatig kahadlok si Ellen, nga human unya ning gabhiona isalikway na siya ni Alan. Gigakos siya ni Alan ug nagkaabot ang ilang mga ngabil nga giuhaw sa katam-is sa gugma. Mihigda si Alan sa kama tupad kaniya. “I love you, Ellen!” matod ni Alan samtang nagpadayon ang ilang pagminahalay sa kama. “I love you, too, Alan! I’m yours, body and soul!” ni Ellen nga mibawos paggakos kang Alan. Ug daw gibati nilang duha nga nawala sila sa kalibutan tungod sa katam-is sa ilang pagminahalay.
Unya pagka taudtaod kalit nga miluag ang paggakos ni Alan kang Ellen. Mitindog kini ug mitutok pag-ayo kang Ellen. “May tinagoan ka nga wa nimo isulti nako, Len!” nahimalingka si Alan nga midali pagsul-ob sa iyang mga sapot. “Unsay buot mong ipasabot, Love?” ni Ellen nga wa mokihol didto sa kama. Nagpaka-aron-ingnon siya nga wa masayod, bisan mao kiniy iyang gikahadlokan nga mahibaw-an ni Alan. “Di ka na diay virgin!” pintok nga pulong ni Alan. “Importante alang nako nga ang babayeng akong pangasaw-on birhen pa ug makahatag kinig dakong kalipay sa akong kinabuhi,” ni Alan. “Pag-ilis na kay ihatod ko ikaw sa inyo. Ayaw na paghunahuna sa atong kasal. Di na kini mahinayon!”
DIDTO sa iyang lawak, usa ka gabii, paglabay sa usa ka buwan, nagbakho si Ellen. Wala na silay komunikasyon ni Alan. Gibasol niya si Treb, ang ‘first love’ niya nga maoy nikutlo sa ulay niyang bulak. Apan misantop pod sa iyang hunahuna nga ang iyang kaugalingon mismo ang angay gayod nga basulon, nganong nisugot siya nga manulod sila sa motel ubos sa saad niini nga maoy pakaslan. Mga duha ka tuig na nga nawala si Treb sa iyang kinabuhi. Unya usa ka higayon nagkita sila ni Dina, ig-agaw ni Treb didto sa CC Mall. Nagka-estoryahanay sila.
“Ay, Len, wa diay mosulti si Treb nimo bahin sa iyang panaw paingon sa Canada? Adto man siya didto motrabaho isip ‘accountant’ sa usa ka ‘exporting company,” tug-an ni Dina.
“Wa gyud, Din, uy! Mora lang kog nuog nga gisalibay niya sa suok!” ni Ellen.
Wa gyud makatawag o maka-teks sa selpon si Treb kang Ellen hangtod nga nagkaila sila si Alan ug nagkahigugmaay.
UNYA usa ka Dominggo sa kaadlawon niana mitunog ang selpon ni Ellen. Gipunit kini. “Hello!” matod niya. “Good morning, my dear! Kumusta ka?” tingog ni Treb. Wa niya tubaga, iyang gipawong ang iyang selpon. Dili na siya buot nga makig-estorya kang Treb.
Nianang pagka buntag gipukaw siya mama niya Belen kay may bisita siya.
“Treb?” maoy milugwa sa iyang baba. “Kasayo god nimo!”
“Nia ko kay nakabalita man ko gikan ni Dina nga kaslonon ka na,” ni Treb.
“Wa madayon kay na-diskubrehan ni Alan nga dili siya maoy unang lalaki sa akong kinabuhi,” ni Ellen nga mitutok kang Treb.
“Buot kong mangayo nimo’g pasaylo, Len. Gusto ko nga magka-estoryahay ta. Sumpayan nato ang nabugto natong gugma. Dominggo man ron ug wa kay trabaho, pwede nga manuroy ta sa gawas kay duna koy plano nga makalipay natong duha sa atong kinabuhi. Naa koy awto nga ‘rent-a-car.’ Okey ka?” Misugot si Ellen.
Nangadto sila sa Sirao diin daghan ang kabulakan. Sa porma’g tablado nga may higanteng letrang ‘LOVE’ nanglingkod sila si Ellen ug Treb. Paglabay sa pipila ka gutlo nagkasinabot sila si Treb nga magpakasal.
Nianang pagkasunod semana gikasal sila si Ellen ug Treb didto sa korte, sa sala ni Judge Simon Mudmod. Mga saksi sila si Dina ug ang iyang uyab nga si Kevin. Diha sab sila Mama Belen ug si Carmen, suod nga higala ni Ellen.
(KATAPUSAN)