MARICHO ROLLON
Lower Becirril, Boljoon, Cebu
Ang bidlisiw sa adlaw
Mitandang sa akong ig-agaw
Sa karton nakatulog ug dili papukaw
Apan natugaw sa hunahuna
Og unsay ipamahaw.
Mga tawo nga nanaghugyaw
Misinggit sa manggad gusto mopakyaw.
Pila ka libo ang nanaglakaw
Mga tiil nga napuno sa hugaw.
‘Tabang!’ siyagit sa usa ka inahan
Mga mata luhaan kay nalabnihan
Salapi nga hinagoan dili buot usikan
Nahanaw taliwala sa ngitngit nga dalan.
Mga dagway simbolo sa akong pangutana
Aduna ba kahay
kalinaw sa
kinabuhi nila?
Mga mata nga napuling sa laksot nga hustisya
Nangandoy mahikatulog sa humok nga kama.
Lugar nga yano ug dali nga pangitaon
Mga pahiyom sa dagway lisod kawangon
Kusog pagtulod sa kagangkagang nga kariton
Karga ang nag-awas-awas nga mga sugilanon.