Aron sa pagpalig-on sa koordinasyon sa Mactan Cebu International Airport Authority (MCIAA) ug alang sa kaayohan sa dakbayan sa Lapu-Lapu, maoy tumong ni Mayor Junard “Ahong” Chan kon siya makalingkod isip sakop sa Board of Directors (BOD) sa MCIAA.
Si Chan niingon sa Sunstar Cebu sa Martes, Hunyo 6, nga daghan siya og mga plano sama sa pagpaayo, pagpalambo, seguridad, ug uban pa sa airport.
“Unsa ilang gusto ug kami sad nila kon unsa among plano, ang airport since naa man sa sud sa area sa Lapu-Lapu,” matod ni Chan.
Dako usab nga tabang ang Siyudad sa paghatag og mga solusyon ug matubag ang mga concern sa internasyonal nga tugpahanan alang sa dugang kaluwasan ug seguridad sa mga bisita.
Niadtong Mayo 2023, giaprobahan sa ikatulo ug katapusang pagbasa sa House of Representatives ang House Bill No. 7798, nga nag-amendar sa Section 6 sa Republic Act No. 6958, o gitawag nga “Charter of the Mactan-Cebu International Airport Authority”.
Apan sa gihapon, ipasa kini sa Senado ug dayon sa Presidente alang sa pag-aprobar.
Ang balaudnon gipangamahanan ni Lapu-Lapu City Lone District Rep. Ma. Cynthia “Cindi” King-Chan nga gitumong sa maong balaudnon ang pagdugang sa gidaghanon sa BOD sa MCIAA.
Sa sayo pa, niadtong Pebrero 2, 2023, si Mayor Chan wala makalingkod sa BOD tungod kay ang balaod kinahanglan nga usbon aron siya mamahimong sakop sa MCIAA board.
Ang Dakbayan sa Lapu-Lapu nangayo og puwesto sa MCIAA Board sukad nahimong highly urbanized ug nakalingkawas gikan sa administrative supervision sa Probinsiya sa Sugbo niadtong 2007.
Gimugna sa Kongreso ang MCIAA niadtong Hulyo 31, 1990, ubos sa RA 6958 aron “pagbuhat sa ekonomikanhon, hapsay ug epektibo nga pagkontrolar, pagdumala ug pagpadagan sa Mactan International Airport sa Probinsya sa Sugbo,” ang ikaduhang labing busy nga tugpahanan sa nasod.
Gikan sa Enero hangtod Abril 2023, gikan sa datos sa mciaa.gov.ph/statistics/, adunay total nga 23, 187 ka mga flight nga ning-abot ug ninggawas nga domestic. Sa internasyonal nga mga flight, sa kinatibuk-an 4, 485 nga niabot ug nanggawas.
Alang sa mga pasahero, sa Enero hangtod Abril 2023, ang MCIAA nakaalagad na og 2, 379, 078 ka domestic samtang 669,567 ka international. (HIC)