Moabot sa P6.5 bilyunes ang alkanse sa mga kompaniya matag adlaw kon magmalampuson ang mga hacker sa paghimo og cyber attack sa nag-unang kritikal nga mga imprastraktura sa nasod.
Kini base na sa usab sa 2021 PSEI (Philippine Stock Exchange Inc.,) financial report, kon ugali nga atakehon ang nag-unang mga Critical Information Infrastructure (CII) sa Pilipinas.
Mao kini ang rason nga daghang dagkong mga kompaniya hilabi na kadtong naggamit og modernong teknolohiya nga aduna’y importanteng datos nga mokuha og kaugalingon nga cybersecurity professionals aron sila magpabilin nga luwas sa pag-atake.
Apan sukwahi sa kasamtangan nga kahimtang sa nasod nga aduna’y daghang naggamit og moderno nga teknolohiya ug aduna’y dagkong mga kompaniya nga naggamit sa modernong teknolohiya, nasayran nga halos way mga cybersecurity professional ang nasod nga maoy magprotehir sa seguridad sa cyberspace.
Mao kini ang nag-unang topic sa ika-15 nga media seminar nga gipangulohan sa United States Embassy Manila nga giulohan og ”Building Blocks: The U.S. - Philippine Partnership for a Prosperous and a Cyber-secure Digital Economy,” nga gipahigayon sa dakbayan sa Sugbo sa Hunyo 6 ug 7.
Matod ni senior economic growth specialist sa United States Agency for International Development (USAID) - Office of Economic Development Governance John Avila nga gibanabana nga anaa lang sa 200 ka mga cybersecurity professional ang anaa sa nasod.
Tungod niini, nanawagan karon ang mga eksperto ug advocates ngadto sa gobiyerno sa nasod nga unta hatagan kini og pagtagad ug mapalapad pa ang impormasyon ug awareness sa publiko sa kamahinungdanon niining cybersecurity profession.
Matod ni Carlos Ely Tingson, senior vice president sa Cyber Risk, Kroll, nga tulo sa upat ka mga kompaniya sa nasod ang nakasinati og hulga sa cyber attack.
NAHULGA
Sa datos sa PSEI, nasuta nga ang unom ka mga industriya nga taas ang risgo sa cyber attack anaa sa sektor sa bangko o financing, transportasyon, telcos, energy, water ug healthcare.
Wala pa malakip niini ang gobiyerno ug ang usa sa malambuon nga business process outsourcing (BPO) sa nasod.
Gani gibutyag ni Kanishka Gangopadhyay, press attachè sa US Embassy Manila, nga ang pagpalambo sa cybersecurity professionals sa nasod dili lamang alang sa mga nag-unang sektor nga giisip nga critical infrastructure (CI) ug gobiyerno apan naglakip na ang mga BPO nga maoy usa sa mga naghatag og daghang trabaho sa mga Pinoy.
Nasayran nga usa sa labing dako nga BPO nga anaa sa nasod, iya sa kompaniya sa US.
Isip tabang sa Estados Unidos sa Pilipinas, mas gipalapdan pa niini ang paghatag og pundo alang sa pagbansay og bag-ong mga cybersecurity professional, matod usab ni Saptarshi Basu, Philippines Economic Officer US Embassy Manila.
Sa datos sa 2022 (ISC) Cybersecurity Workforce Study, niabot na sa 3.4-million ka mga cybersecurity workforce ang panginahanglan sa tibuok kalibutan.
Bisan pa man sa taas nga panginahanglan sa cybersecurity professionals, gamay ra ang madawat nga mipaubos sa tukma nga training ug certification.
Usa usab sa mga hinungdan niini ang kakuwang o way kurso ang mga tunghaan nga nagtanyag ug nagtutok sa cybersecurity training sa nasod. (HBL)