Mokabat sa 400,000 ka riders ang kabahin na sa Asenso Riders sa Pag-IBIG Fund, matod ni Pag-IBIG chief Marilene Acosta niadtong Miyerkules, Hunyo 7, 2023.
Matod ni Acosta nga ang Sugbo maoy nahimong ikaduhang destinasyon sa paglusad sa Asenso Rider Raffle Promo tungod kay sunod sa Manila, ang Sugbo maoy ikaduha sa labing daghan og Asenso Riders.
Ang Pag-IBIG Fund nipasalig nga ang kontribusyon sa mga rider dili deduction, kon dili kontribusyon alang sa ilang investment.
“Magkakaroon sila ng pagkakataon na maenjoy ang mga benepisyo ng Pag-IBIG Fund kagaya ng pag-avail ng short-term loans, pangpuhunan,” matod ni Acosta.
Lakip sa labing importante nga mga benepisyo, matod ni Acosta, mao ang kahigayunan nga makapanghulam alang sa ilang gipangandoy nga mga balay sa labing ubos nga interest rates ug labing taas nga panahon sa pagbayad.
Ang Asenso Rider Raffle Promo himuon sa tulo ka yugto, gikan sa una nga preliminary draw gikan sa Mayo 25 hangtod sa Hunyo 30; ikaduhang draw gikan sa Mayo 25 hangtod Septiyembre 30, ug ang grand draw gikan sa Hunyo 1 hangtod Nobiyembre 30, 2023.
Si Angkas Cebu City Operations director Enrico Luis Luk niingon nga pipila sa ilang mga rider mga miyembro sa Pag-IBIG gikan sa ilang mga trabaho kaniadto, apan karon, uban sa pakigtambayayong sa Pag-IBIG, siya niingon nga ang mga drayber aduna nay kahigayunan nga mouswag ang ilang kinabuhi.
“This is really nice to let them know, we’re gonna spread the word to all our bikers is not just a mandatory benefit but it has an actual practical use,” matod ni Luk.
Sa mga nagduha-duha sa pagpa-enrol tungod kay dili sila sigurado, si Atty. Marie Antoniette D. Diaz, Senior Vice President Member Services Operations Sector sa Pag-IBIG Fund, niklaro nga ang pundo tinigom sa matag tawo.
“In reality it’s your savings. Maybe when people realize that they’re saving for the future, not just the presence, then they will realize it’s a good thing,” matod pa ni Diaz.
Gihisgutan usab niya nga mas dali na ang pagbayad tungod kay gipalapdan na ang mga kapilian sa pagbayad, lakip ang mga e-payment scheme alang sa mga nag-amot.
Dugang pa ni Diaz nga importante kini ilabina sa mga rider tungod kay naghatag kini og kahigayunan nga makatigom alang sa ilang kaugmaon o gipangandoy nga mga balay.
Ang Pag-IBIG Raffle Promo manghatag og 10 ka bag-ong mga motorsiklo alang sa ilang mga draw. (EKV)