Nia ang mga trivia bahin sa Eat Bulaga nga siguradong makapakurat ug tingali karon lang ninyo mahibaw-an human sa 44 katuig sa maong longest-running noontime variety show.
LEGENDARY
Silang Tito, Vic and Joey unang nahimong hosts sa musical gag show nga “Okay Lang” (1970) sa IBC-13. Gisundan ni sa Eat Bulaga sa RPN-9 (1979-1989). Gibalhin sa ABS-CBN (1989-1995) ug dayon sa GMA-7 (1995-2023). Ug karon sa TV-5 nga maoy ilang ikalima.
“DABARKADS”
Si Francis Magalona ang unang nitawag og “Dabarkads” sa Eat Bulaga. Gibutyag ni atol sa tribute nila sa Master Rapper niadtong 2009.
“EAT BULAGA!”
Basi sa Global Brand Database, ang Tape, Inc. maoy unang nakakuha og trademark registration sa pangan nga “Eat Bulaga!” ug “EB” sa Philippine Bureau of Trademarks niadtong June 14, 2013. Apan gikatakda ning mo-expire karong June 14, 2023 ug renewable sa laing 10 katuig.
FLOOR DIRECTOR
Sa wala pa nisikat, si Jose Manalo mao ang floor director sa Eat Bulaga. Samtang si Wally Bayola ang tiglingaw sa live studio audience atol sa commercial break. Dili makalimot si Bayola sa iyang unang adlaw sa Eat Bulaga (May 3, 2000) kay mao ni ang iyang 28th birthday.
KINSA SI JALOSJOS?
Si Romy Jalosjos Sr., 82 anyos, maoy tag-iya sa Tape, Inc. ug producer sa Eat Bulaga. Siya ang kanhi bana sa aktres nga si Nida Blanca. Nakasal usab si Romy sa singer nga si Lourna Pal nga maoy inahan nilang Lana ug Bullet Jalosjos. Aduna pa siyay laing duha ka mga anak sa laing karelasyon.
GAMHANAN
Si Romy Jalosjos Sr. nakumbikto og life sentence sa kasong pagpanglugos sa 11-anyos nga batang babaye niadtong 1997 apan gibuhian human gihatagan og “clemency” ni kanhi Presidente Gloria Arroyo niadtong 2009 nga iyang kapartido.
BANGGIITAN
Sa artikulo sa Inquirer niadtong 2003, gikumpirmar ni Chiqui Hollmann ang “short-live romance” niya ni Vic Sotto. Si Chiqui mao ang labing una nilang female co-host. Silang Coney Reyes, Christine Jacob, Kristine Florendo, Angela Luz, Pia Guanio ug siyempre si Pauleen Luna, puros mga co-host usab niya sa Eat Bulaga.
THEME SONG
Basi sa source sa Cabinet Files sa Pep, ang naghimo gyud sa lyrics sa theme song sa Eat Bulaga si Vincent Dy Buncio. Samtang si Vic Sotto mao na ang naghimo sa melodiya.
CATRIONA GRAY
Tinuod nga nahimong contestant si 2018 Miss Universe Catriona Gray sa Little Miss Philippines niadtong 1999 apan sa Australia ug dili sa mismong Eat Bulaga.
SULAGMA LANG?
Silang Tito, Vic ug Joey nanamilit sa Eat Bulaga, Mayo 31, nga mao say 38th death anniversary sa Fil-Am actress nga si Pepsi Paloma nga giingong biktima sa “gang rape” apan niatras sa kaso batok nilang Vic, Joey ug Richie D’ Horsie. Si Pepsi naghikog Mayo 31, 1985 sa edad nga 18.
“SPOLIARIUM”
Bisan kon gi-deny na ni Ely Buendia apan naa gihapon ang mga pagduda nga ang lyrics sa kantang “Spoliarium” sa Eraserheads niadtong 1997 pasumbingay sa “1982 rape case” ni Pepsi Paloma ug sa apartment diin giingong nahitabo ang krimen.