Mingkulit og kasaysayan sila si Nikola Jokic ug Jamal Murray sa ilang pag-agak sa Denver Nuggets sa kadaugan batok sa host Miami Heat, 109-94, sa Game 3 nga maoy naghatag kanila og 2-1 nga bintaha sa National Basketball Association (NBA) ning Huwebes, Hunyo 8, 2023 (PH time).
Ang duha ka mga pambato sa Nuggets nahimong labing unang managkauban nga nakaposte og triple-doubles sa usa ka duwa sa NBA Finals.
Si Jokic, kinsa kanhi two-time MVP, nitali og 32 puntos, 21 ka rebounds ug 10 ka assists samtang si Murray nimugna og 34 puntos, 10 ka rebounds ug 10 ka assists.
Mao sab kini ang labing unang higayon sa regular season ug hasta sa playoffs nga ang duha ka managkauban nakaposte og 30-point triple-doubles.
“By far, their greatest performance as a duo in their seven years together,” matod ni Nuggets coach Michael Malone.
Gipahimuslan sa Nuggets ang ilang bintaha sa gidak-on ug gitas-on aron kontrolahon ang panagsangka hilabi na sa 2nd half.
Ang Nuggets, nga karon pa nakasulod sa finals, midominar sa rebound department, 58-33.
“I’m just glad that we won the game,” asoy ni Jokic. “It was a big one for us because they won in our arena. We just didn’t want to go down 2-1.”
Ang Heat gipangulohan ni Jimmy Butler pinaagi sa iyang 28 puntos samtang niamot og 22 puntos ug 17 ka rebounds si Bam Adebayo.
Ang Game 4 ipahigayon gihapon sa korte sa Heat karong Sabado, Hunyo 10, 2023.
“We’ve got to come out with more energy and effort and that’s correctable,” asoy ni Butler. “That’s on us as a group.”
Nagkinahanglang modaog ang Heat sa Game 4 aron dili sila mobiyahe pagbalik sa korte sa Nuggets alang sa Game 5 nga adunay 3-1 nga biya sa series.
“It’s not an easy task to do,” dugang ni Butler. “But if we want to win, we’re going to have to figure it out.”
Sa nag-unang duha ka mga duwa sa series, naka-rally sa 4th quarter ang Heat apan ning higayuna, wala na motugot ang Nuggets nga mahitabo kini pagbalik.
“First two games, they won the fourth quarter,” pahimangno ni Malone sa iyang ginsakupan human sa 3rd quarter. “Tonight, we win the fourth quarter, we win the game.”
Naminaw ang iyang mga batos.
Sa sayong bahin sa 4th quarter, gipaburot sa Nuggets ang ilang labaw ngadto sa 21 puntos, 93-72.
Wala nakabangon ang Heat human niini.
Puntos matag usa:
Denver (109)- Murray 34, Jokic 32, Brown 15, Gordon 11, Caldwell-Pope 6, Brown 5, Green 4, Porter 2.
Miami (94)- Butler 28, Adebayo 22, Martin 10, Lowry 9, Robinson 9, Vincent 7, Love 6, Strus 3, (AP)