PATAY ang mag-uuma sa dihang gitadyakan sa binuhi niining kabayo ug nahulog sa pangpang alas 11:20 sa buntag, Miyerkules, Hunyo 7, 2023, sa Alamada, Cotabato Province.

Giila ang biktima nga si Jerry Marantao, 39, minyo, ug nagpuyo sa Barangay Rangayen, Alamada sa nahisgutang probinsiya.

Matud ni Arnel Marantao, paryente ni Jerry, nga nagkarga og sinakong mais ang biktima sa iyang kabayo nga dal-on unta sa sentro nga bahin sa barangay.

Nipuwesto, sumala pa, sa likod nga bahin sa kabayo si Jerry aron ikarga ang sinakong mais.

Apan kalit lang nag-wild ang kabayo ug gitadyakan ang biktima tunong sa dughan niini ug nalabay sa lawom nga pangpang.

Nawad-an sa panimuot si Jerry, hinungdan nga gidala dayon siya sa Alamada District Hospital apan gideklara sa doktor nga patay na.

Nasayran nga grabeng bali sa nagkadaiyang parte sa lawas ang nahiaguman sa biktima nga nahulog sa pangpang lakip na ang iyang dughan nga naigo sa sipa sa kabayo.

Nagpasidaan ang lokal nga panggamhanan sa Alamada ngadto sa mga dunay binuhing hayop nga gigamit sa uma nga dili palabian sa pagbulad sa init ug kanunay nga painumon og tubig aron dili mag "wild" sama sa nahitabo sa biktima.