Usa ka Japanese national patay na nga niabot sa tambalanan human nabangga sa ngilit sa flyover sa Barangay Mambaling, siyudad sa Sugbo.

Si Police Staff Sergeant Ronnel Cabansay, traffic investigator sa Mambaling Police Station, niila sa biktima nga si Aochi Yasuo, hingkod, kasamtangan nga nagpuyo sa Barangay Pardo, siyudad sa Sugbo.

Ang biktima sakay sa iyang Nissan Juke paingon sa habagatang bahin sa Dakbayan sa Sugbo ug kalit lang nibangga sa kilid o ngilit sa flyover nga niresulta sa iyang kamatayon.

Ang Mambaling Police mosusi karong adlawa, Hunyo 9, 2023 kon unsay hinungdan sa aksidente. Ang kapulisan buot mopa-autopsy sa lawas ni Yasuo aron pagsuta kon wa bay kondisyon sa panglawas nga nakaingon nga siya nabangga sa flyover.

Samtang, si Police Major Jonathan Beethoven Taneo, hepe sa Mambaling Police, nibutyag nga nakig-alayon na sila sa Japanese Consulate sa Dakbayan sa Sugbo aron mapahibalo ang mga kabanay sa biktima.