Babaye patay, kapuyo kritikal ug laing duha nangaangol human ilang mga motorsiklo gidaro sa usa ka Elf truck, alas 9:45 sa gabii sa Miyerkules, Hunyo 7, 2023, sa national highway sa Proper, Brgy. Bolinawan, dakbayan sa Carcar.
Si Marites Mangyao, 24, dunay kapuyo taga Bonsai, Brgy. Bolinawan, patay nang niabot sa tambalanan. Samtang, kritikal iyang kapuyo nga si Argie Baclay, 28, maoy nagmaniho sa motorsiklo.
Nangaangol usab sila si Renan Repompo, 32, drayber sa habalhabal, taga Sitio Dan-Dan, Brgy. Poblacion 1, Carcar ug iyang pasahero nga si Lonel Lotillos, 34, taga Siervas, Brgy. Poblacion 1 sa samang siyudad.
Gidakop ug gipriso si Jeffrey Labora Dumogho, 33, ulitawo, taga Lower Mohon, dakbayan sa Talisay City, drayber sa Isuzu Elf truck.
Si Patrolman Jerome Palao, imbestigador sa Carcar City Police Station nga nahinabi sa Superbalita Cebu, nagkanayon nga ang manag live-in nga sila si Baclay ug Mangyao, sakay sa ilang Black Skygo 100 motorcycle padulong sa Proper Bolinawan.
Ang duha manuroy unta kay motan-aw sa kalingawan sa barangay.
Ang Elf truck nga gimaniho ni Dumogho gikan sa lungsod sa Sibonga kay nagtaod og mga glass sa ilang kustomer ug padulong na mopauli sa dakbayan sa Talisay apan kusog nakapadagan ang drayber.
Mi-overtake sa motorsiklong gisakyan sa manag live-in, apan wala makontrolar ni Dumogho ang manobela sa Elf truck tungod sa kakusog sa pagpadagan, iyang nadaro ang motorsiklo sa manag live-in partner.
Gidaro sab sa Elf truck ang gikasugat nga motorsiklo nga gisakyan nila ni Repompo ug Lotillos.
Ang mga biktima gidali sa pagdala sa Cebu Provincial Hospital-Carcar City sa mga personnel sa City Disaster Risk Reduction Management Offie (CDRRMO), apan si Mangyao DOA.
Iyang kapuyo nga si Baclay kritikal nga atol ning pagsuwat gibalhin sa Vicente Sotto Memorial Medical Center (VSMMC) sa dakbayan sa Sugbo.
“Ngitngit kaayo nang lugara. Killer highway gyud. Delikado nang dapita kon kusog magpadagan. Bag-uhay lang nadisgrasya ang usa ka konsehal sa nahisgutang lugar,” dugang ni Palao.
Kasong reckless imprudence resulting in physical injury, homicide and damage to property ang giandam sa kapulisan batok kang Dumogho. (GPL)