Panimawos ang usa sa gitan-aw nga motibo sa pagpusil-patay sa usa ka babaye nga giingong nalambigit sa ilegal nga drugas sa Sitio Lawis, Alaska, Barangay Mambaling, dakbayan sa Sugbo sa alas 2 sa kaadlawon sa Huwebes, Hunyo 8, 2023.
Matod ni Police Colonel Ireneo Dalogdog nga nailhan na sa Mambaling Police Station kon si kinsa ang nipusil kang Adessa Alfar Fernandez.
Ang lalaking suspek nagpangidaron pa og 17 anyos nga bag-o lang nakagawas sa Operation Second Chance.
Nasuko, matod pa, ang suspek uban sa iyang kaluha tungod si Fernandez ang ilang gidudahan nga nitug-an sa kapulisan labot sa ilang pagpamaligya og shabu nga maoy nakaingon nga sila nasulod sa OSC.
Ning bag-o lang, matod ni Dalogdog, nga gipangayoan ni Fernandez og shabu ang suspek ug gihulga nga itug-an sa kapulisan kon dili mohatag.
Tungod niini, giatangan siya sa batan-on samtang naglakaw padung sa bilyaran sa Lawis ug dayong pusil makaduha ka higayon.
Si Fernandez naigo sa dughan ug ulo hinungdan sa iyang kamatayon.
“Base sa initial nga investigation nga gihimo sa Mambaling police station, kining biktima murag iyang ginahulga ning maong suspect nga kon dili gani ka, kay mamarokay man ning kambal, kining mga suspek nga kon dili gani mo manghatag og shabu isumbong ta mo sa mga polis sa Mambaling,” matod ni Dalogdog.
Nagpadayon ang manhunt sa Mambaling police batok sa managkaluha nga killer nga maoy gitudlo sa mga saksi.
Dugang ni Dalogdog nga kaipon kaniadto si Fernandez sa usa ka drug personality nga si Jerome Gonzaga, alyas Balo, nga nabilanggo sa Cebu City Jail apan bag-o lang nakagawas.