HUGOT nga gikondena sa mga dog lovers ang nahitabo sa usa ka iro nga gipusil unya namatay sa wala mailhing suspek samtang naghigda lang daplin sa dalan.
Tungod niini naghangyo sila ngadto sa kapulisan sa Kidapawan Police Station nga palawman pa ang pagsubay sa pagpamusil aron nga matumbok ang suspek ug patubagon sa salaod nga iyang gibuhat.
Ang iro nga nag-viral sa social media ginganlan og Whitey nga gikan sa Purok Kiwi, Ortega Subdivision sa Kidapawan, namatay samtang giatiman sa Davao Emergency Veterinary Hospital alas 3:45 sa hapon, Huwebes, Hunyo 8, 2023.
Giingong naghigda lang ang iro daplin sa kalsada sa dihang wala mailhing tawo ang nagpusil kaniya.
Gitabang ang iro sa mga netizens hangtud nga gidala ngadto sa Davao Emergency Veterinary Hospital aron nga matambalan.
Daghan ang naluoy nga mga netizens busa nagtinabangay sila aron nga maoperahan si Whitey pangunahan sa Kidapawan City Sangguniang Kabataan Federation President Councilor Cenn Taynan, Whitey Friends gikan sa nahisgutang siyudad, Purpaws Group nga gipangulohan ni Phm Mha ug uban pa.
Nasayran nga nakuha sa lawas sa iro ang duha ka balinis sa bala sa 9mm nga pistola. Apan samtang naa sa recovery stage, kalit matud pa nga nga nakasinati og cardiac arrest si Whitey ug namatay.
Nauli na sa Kidapawan City si Whitey ug gilubong nga gitambongan sa mga dog lovers sa siyudad.