Plano ni Tabuelan Mayor Raul Gerona nga magtukod og “taboan” o farmer’s market nga libre aron magamit sa 2,000 ka mga mag-uuma sa maong lungsod.
Gitug-an ni Gerona sa Sunstar Cebu sa sidelines sa Suroy-suroy Sugbo Explore the Midwest Opening Salvo sa Tabuelan sa Sabado, Hunyo 10, nga ang lungsod nigamit sa financial aids ug insentibo sa Kapitolyo nga mokabat sa P2 ngadto sa P3 milyunes sa pagtukod og mga bag-ong kalambuan sama sa bag-ong foodcourt, nga nahimong bag-ong tourist spot sa daplin sa suba duol sa Tabuelan Market.
Ning higayuna, nagplano si Gerona nga mogamit og bisan unsang insentibo o ayuda gikan sa Kapitolyo sa pag-abli og “taboan” kilid sa Police Station sa sentro sa lungsod.
Niining paagiha, ang mga mag-uuma dili na mamaligya daplin sa karsada ni mobayad sa bayrunon sa merkado.
Ang Tabuelan maoy host sa opening salvo sa Suroy-suroy Sugbo Explore Midwest tour sa Hunyo 10 hangtod 12, 2023. (DCL)