Usa ka kanhi manager sa South Road Properties (SRP) nipasidaan nga mawala ang binilyon ka pesos kon ang Cebu South Coastal Road (CSCR) butangan og intersection nga makapahinay sa dagan sa trapiko.
Kini, human ang buhatan sa mayor nimando nga ablihan pag-usab ang giwang atubangan sa Il Corso sa tuyo nga himuon kini nga intersection, bisan pa sa board resolution no. 37-098-2023 nga nagmando sa Cebu City Transportation Office (CCTO) sa pagsira dayon niini niadtong Mayo 26, 2023.
Si Engineer Nigel Paul Villarete, urban planner ug kanhi manager sa SRP, niingon sa SunStar News and Commentary Program Beyond the Headlines niadtong Hunyo 9, 2023, nga ang mga intersection dili “economically viable” alang sa expressway.
Gipasabot ni Villarete nga ang economic viability sa CSCR nagdepende sa economic internal rate of return (EIRR) niini, kon konsiderahon ang gikusgon sa mga sakyanan.
Si Villarete niingon nga ang CSCR orihinal nga gidesinyo isip expressway nga adunay minimum nga gikusgon nga 60 ngadto sa 80 kilometro matag oras alang sa mangaging mga sakyanan, sa wala pa kini us-usi sa Kagamhanan sa Dakbayan ngadto sa 40 kilometro matag oras.
Siya nangatarungan nga ang ekonomikanhon nga viability sa CSCR makunhuran kon butangan og mga intersection ug U-turn slots nga makabalda sa dagan sa trapiko.
Tungod sa sitwasyon, sa higayon nga mohinay ang gikusgon sa dagan sa mga sakyanan, moubos usab ang economic viability sa usa ka karsada.
Dugang pa niya nga ang CSCR proyekto sa Nasudnong Kagamhanan, diin ang Department of Public Works and Highways (DPWH) maoy nagpasiugda niini.
Dugang niya nga ang Nasudnong Kagamhanan dili mopatuman og bisan unsang proyekto kon dili moagi sa technical evaluation nga giaprobahan sa National Economic and Development Authority (NEDA) ug Bureau of Design (BOD).
Gitun-an na sa Nasudnong Kagamhanan ug DPWH ang posibilidad nga adunay mga intersection ug U-turn slots daplin sa karsada, apan gisalikway kini tungod kay dili kini ekonomikanhon, dugang ni Villarete.
Matod niya nga base sa mga technical evaluation nga gihimo sa siyentipikanhong paagi, ang U-turn slots sa duha ka tumoy sa CSCR mao ang labing ekonomikanhong mga solusyon alang sa dalan.
Giklaro usab ni Villarete ang kalainan sa SRP ug CSCR.
Matod niya nga ang SRP usa ka luna sulod sa gi-reclaim nga lugar, samtang ang CSCR kay tibuok karsada nga nilagbas sa SRP.
Dugang niya nga ang CSCR adunay tulo ka components: ang viaduct, SRP, ug Talisay City component.
Iyang gipasabot nga ang SRP ug CSCR duha ka managlahing mga proyekto, nga gihimo sa duha ka managlahing mga proponent.
Ang SRP usa ka proyekto nga gipanag-iya sa Kagamhanan sa Dakbayan sa Sugbo samtang ang CSCR usa ka proyekto sa Nasudnong Kagamhanan diin ang DPWH maoy nagpasiugda niini. (AML)