Gihangyo ang mga stakeholder sa industriya nga ang mga banko nga mo-waive o mopakunhod sa bayrunon sa digital nga pagbalhin sa kuwarta o transaksyon sa banko, makadasig sa daghang Pilipino sa pag-apil sa digital nga ekonomiya.
“Any support to improve the ease of use and encourage the use of digital transactions is a welcome development,” matod ni Melanie Ng, regional governor sa Philippine Chamber of Commerce and Industry-Central Visayas.
Ang Land Bank of the Philippines nga gipadagan sa estado nagpahibalo sa Huwebes, Hunyo 15, 2023, nga gipaubos niini ang bayad sa pagbalhin sa pundo pinaagi sa InstaPay.
Ang tanang transaksyon sa fund transfer, bisag unsa pa ang kantidad, ipailalom na sa fixed transaction fee nga P15, gikan sa kanhing P25.
“By lowering the fund transfer rate, more customers will benefit from the convenience and efficiency of our products. This is part of our commitment to provide accessible and affordable digital banking solutions, and to help expand financial inclusion,” sumala sa pamahayag ni Landbank president ug chief executive officer Lynette Ortiz.
Sa unang tulo ka bulan sa tuig, ang Landbank, pinaagi sa iyang tulo ka digital platforms, nipahigayon sa mga transaksyon nga mokabat sa kinatibuk-ang P265.7 bilyunes. Kini nga mga plataporma mao ang Landbank Mobile Banking App ug iAccess alang sa retail nga mga kliyente ug weAccess alang sa corporate accounts.
Sa pagtubag sa balita, ang presidente sa Cebu Chamber of Commerce and Industry nga si Charles Kenneth Co, niingon nga “I hope the other banks will follow Landbank’s move in lowering their transaction fees to P15. By encouraging digital payments, commerce will be easier and faster.”
MINILYON
Sa laing bahin, ang BanKo, ang microfinance arm sa Bank of the Philippine Islands (BPI), niadtong Mayo, nipahibalo nga libre na ang pagpadala og kwarta pinaagi sa InstaPay pinaagi sa mobile app niini.
Ang mga kliyente sa BanKO mahimong mobalhin hangtod sa P50,000 kada adlaw ngadto sa kapin sa 70 ka partner nga mga bangko ug e-wallet sa InstaPay sa real-time, bisan kanus-a ug bisan asa nga walay bayad.
Makabenepisyo kini sa bisan kinsa nga magbukas sa usa ka account, ingon man ang 315,000 ka aktibo nga depositors sa BanKo sa tibuok nasod.
Ang banko niingon nga pinaagi sa paghimo sa digital fund transfers nga mas sayon, kini karon makadani sa minilyon nga self-employed micro-entrepreneur, informal workers ug uban pang mga indibidwal gikan sa unbanked ug underbanked nga bahin, ug makatabang kanila sa pagkab-ot sa ilang pinansyal nga mga tumong.
Ang InstaPay usa ka electronic fund transfer (EFT) nga serbisyo nga gidumala sa BancNet Inc. Laing sikat nga serbisyo sa EFT mao ang PESONet nga gidumala sa Philippine Clearing House Corp.
Ang InstaPay kay alang sa real-time, low-value nga electronic fund transfer para sa mga transaksyon hangtod sa P50,000 kada adlaw samtang ang PESONet nagsilbi sa mga high-value transactions.
PANAWAGAN
Ang waiving of charges nagsuporta usab sa panawagan sa Bangko Sentral ng Pilipinas (BSP) alang sa mga banko nga tangtangon ang mga bayrunon sa gagmay nga mga transaksyon ug dasigon ang daghang mga Pilipino sa paggamit sa digital nga pagbayad.
Sa iyang Twitter post niadtong Pebrero 25, si BSP Gov. Felipe Medalla niingon nga ang sentral nga banko andam nga makigtambayayong sa industriya sa pagpangita og mga paagi sa pagwagtang sa mga bayrunon sa gagmay nga kantidad nga mga pagbalhin sa pundo ug pagdasig sa mas daghang Pilipino sa paggamit sa digital nga pagbayad.
“If the fee is P15 for a P200 transaction, then the fee is quite large relative to the amount being sent,” matod ni Medalla.
Ang BSP nagtinguha nga ma-digitize ang 50 porsiyento sa volume ug kantidad sa retail transactions ug aron ang 70 porsyento sa mga Filipino adults mahimong kabahin sa pormal nga financial system karong tuiga ubos sa Digital Payments Transformation Roadmap niini.
Ang presidente sa Cebu Bankers Club nga si Chester Benedict Go niuyon kang Medalla sa mga plano sa pagpaubos o pagtangtang sa mga bayrunon aron madasig ang publiko sa paggamit sa digital platforms sa mga banko.
“There are a lot of people using digital banking apps already. They pay their bills, (engage in) bank fund transfers and other services, but I still think that people still hesitate to do fund transfers to other banks because of the charges,” matod ni Go sa SunStar Cebu.
“We commend Landbank’s move as this could only benefit customers. As the fee structure for retail payments and transfers is completely market-driven, other providers will respond as appropriate to their respective market strategies. In the end, lower fees would be a boon to users of digital payment systems,” matod ni Albert Concha, chairman sa Rural Bankers Research and Development Foundation.
Ubang banko nga nag-waive sa InstaPay fees alang sa indibiduwal nga mga transaksyon sukad sa Abril 30 mao ang CIMB Bank Philippines Inc., Rural Bank of Guinobatan Inc. (waives fees hangtod Hunyo 30), SeaBank Philippines Inc. Tonik Digital Bank Inc. (KOC, SunStar Cebu)