DAGHAN unta og maparokyano nga madaut sa gidili nga druga sa Davao Oriental kung wala nasikop ang usa ka notadong pusher alas 8:50 sa gabii sa Purok 5, Barangay San Miguel, Tagum City, Davao del Norte.
Kini ang gibutyag sa Philippine Drug Enforcement Agency (PDEA) Davao dihang malampuson nilang nasikpaw ang gituohang notadong pusher nga usa ka alyas Loy, 30-anyos ug residente sa San Isidro, Davao Oriental.
Si alyas Loy usa sa gikonsiderang high-value target (HVT) ug suma sa PDEA-Davao, naglihok ang mga ilegal nga transaksiyon sa suspek sa Davao Oriental.
Saysay sa PDEA-Davao nga taud-taod na sab nilang gisundan ang ilegal nga lihok sa suspek hangtud nga gipailawom nila kini sa test buy.
Dihang pursigido pa nga mobaligya pag-usab ang suspek og shabu sa nagtakuban nga PDEA agent, didto na gihimo ang buy-bust operation.
Pagdawat sa suspek sa buy-bust money bugti sa shabu, gilayon kining giposasan sa operatiba.
Nakuha sa posisyon sa suspek ang mga pakite sa gituohang shabu nga mokantidad tanan og P13,600, usa ka .45 calibre pistol, mga bala ug ang uban pang ebidensiya.
Gibalhog na ang suspek sa Tagum City Police Station, samtang giandam ang kasong Republic Act 10591 kun Comprehensive Firearms and Ammunition Regulation Act of 2013 ug ang Republic Act 9165 kun Comprehensive Dangerous Drugs Act of 2002 batok sa suspek.