Mapahimuslan na sa mga Sugbuanon ang labing una sa Pilipinas nga tubig nga mainom gikan dagat karong Disyembre 2023.
Kini ang gipahibawo ni Atty. Jose Daluz III, chairman sa Board of Directors (BOD) sa Metro Cebu Water District (MCWD) atol sa joint inspection sa lungsod sa Cordova pinangulohan ni Mayor Cesar Suan sa nagpadayong construction sa desalination plant sa Vivant Hydrocore Holdings Inc (VHHI) sa Barangay Catarman, Cordova sa isla sa Mactan, Hunyo 16, 2023.
Si Daluz nagkanayon nga karong Hulyo 3 dad-on sa VVHI, kauban ang Watermatic Philippines, ang ilang mga ekipo aron maoy moproseso sa tubig dagat aron mainom. Ang teknolohiya niini gikan sa Israel.
“They have promised to finish this year. Hopefully we can already supply desalinated water this December and this is the first in the Philipines, the pride of MCWD and Cordova,” matod ni Daluz.
Sa Disyembre gikatakda nga mahuman na ang pag-istalar sa mga ekipo ug ubang gikinahanglan aron makapaagas na sila og tubig gikan sa dagat nga mainom na.
Ang general manager sa MCWD nga si Edgar Donoso nagkanayon nga inanay ang pagsuplay sa VHHI og inisyal nga 5,000 cubic meters per day kun 5 million liters per day (MLD), ug laing 5 MLD sa mosunod nga mga buwan hangtod makumpleto ang 20 MLD sa 2024.
Si Suan nagkanayon nga dako og ikatabang sa lungsod sa Cordova ang presensiya sa maong planta sanglit nakabaton na sila og permanenting suplay sa tubig ug pagpangamdam usab kini sa umaabot nga kalambuan sa ilang dapit.
“Usa ni siya sa pinakadako og impact. Nindot kaayo dili lang sa atong lungsod kon dili sa kinatibuk-ang Mactan island ug Cebu island kay ang atoang Vivant nag-focus nga makahatag og stable nga water para sa Cordova in preparation sa development sa Cordova,” padayag ni Suan.
Ang 20 MLD nga gikan sa VHHI ikonsumo ug i-distribute sa tibuok Cordova nga adunay gibanabana nga 5 MLD matag adlaw samtang ang sobra ipasa sa Lapu-Lapu City o dad-on sa mainland Cebu.
Sa pikas nga bahin, gipahibawo usab ni Daluz nga sa hinapos nga bahin sa 2024 o sa sayong bahin sa 2025, magsugod na usab ang construction sa desalination plant sa Barangay Marigondon sa dakbayan sa Lapu-Lapu.
