Nasayod si Nonito “Filipino Flash” Donaire nga nakasugal ang iyang karera sa iyang pagpakigbatok kang Mexican Alexandro Santiago alang sa inilugay sa bakanteng World Boxing Council (WBC) bantamweight title karong Hulyo 15, 2023 sa Las Vegas, USA.
Tungod niini, gipadayag ni Donaire nga grabe ang iyang paningkamot sa training ug mao kini ang nakahatag kaniya og dugang pagsalig nga modaog ning awaya.
“I’m coming to the ring on July 15 to take that belt home and there’s no second option for me,” matod ni Donaire nga napatik sa www.boxingscene.com.
Si Donaire, kinsa mosuway pagbangon gikan sa 2nd round knockout nga kapildihan batok kang Japanese Naoya “Monster” Inoue niadtong Hunyo, 2022, nag-edad na og 40.
Kon mapilde siya ning awaya, posibleng mao na kini ang senyales sa iyang pagretiro.
Apan determinado si Donaire nga dili kini mahitabo.
“I’ve been training hard to make the most of it. I’ve brought in some really fast fighters who have helped me prepare,” dugang ni Donaire.
Si Donaire, kinsa kanhi four-division world champion, naggunit og 42-7, 28KOs nga rekord samtang si Santiago adunay 27-3-5, 14 KOs nga baraha. (ESL)