Miabot na sa Sugbo ning Miyerkules, Hunyo 21, 2023, si Chinese fighter WeiWei Liu aron sagubangon ang labing una niyang away sa gawas sa China.
Si Liu makigbatok ni Filipino Elmo “Bisdak” Traya karong Sabado, Hunyo 24, 2023, sa main event sa labing unang professional boxing card sa Money Punch Fight sa Consolacion Sports Complex sa lungsod sa Consolacion, Cebu.
Mismong si Money Punch Promotions founder/CEO Christian Faust maoy nangunay sa pagsugat ni Liu ug kauban niini sa Mactan International Airport.
Ang panagsangka nila ni Liu ug Traya alang sa inilugay sa bakanteng World Boxing Foundation (WBF) Australasian super lightweight title.
Si Traya, kinsa usa sa mga boksidor nga nahimong mga sakop sa Money Punch Promotions, adunay 12-5, 8KOs nga rekord samtang si Liu naghupot og 4-0, 2 KOs nga baraha.
Ang stablemate ni Traya nga si Nino Rio Saoy makigbatok ni Ryan Maano sa co-main event.
Magbinukbokay sa undercard sila si Christian Balunan batok Ariston Aton, Yerroge Gura batok Audie Dacua, Jusue Bastillada batok Wilfredo Rota, Pablito Balidio batok Anthony Gilbuela, ug Ramil Macado batok Eldin Guinahon. (ESL)