DILI na magpatuman og rotational brownout o load curtailment ang primary electricity distributor sa Island Garden City of Samal (Igacos), subay sa gipagula nga pahibalo sa Northern Davao Electric Cooperative, Inc. (Nordeco) pinaagi sa ilang official Facebook page.
Kini tubag sa giingong power crisis nga nasinati sa Isla sa Samal diin sa miaging mga bulan ang Samal Island gipaubos sa "state of calamity" gumikan sa krisis sa kuryente.
Sumala sa Nordeco nga gikan niadtong Hunyo 5, 2023, wala na sila nagpatuman og rotational brownout o load curtailment, butang nga gikalipay sa katawhan sa Igacos labi na kadtong mga nanag-iya og negusyo sa Isla.
"To our valued Member-Consumer-Owners: Please be informed that the Northern Davao Electric Cooperative, Inc. (Nordeco) is no longer implementing rotational brownout/load curtailment in the Island Garden City of Samal (Igacos) since 05 June 2023," pamahayag sa Nordeco.
Giingon sa Nordeco nga ang tanang modular generator sets niini ug sa Mindoro Grid Corporation ug Igacos Light and Power Company (ILPC) kasamtangang operational na.
"These modular generator sets are enough to supply power distributed by Nordeco to Igacos," sa ilang pamahayag.
Gitin-aw sab sa kompaniya nga isolated cases lamang ang natigayong power interruptions sa miaging semana sa upat ka barangay sa Kaputian District gumikan suma pa kini sa mga nangaputol nga linya gumikan sa kusog nga ulan ug hangin.
"Nevertheless, Nordeco intensified its implementation of Republic Act 11361, or the Anti-Obstruction of Power Lines Act, to minimize, if not avoid, unscheduled power interruptions due to uncleared lines," sa pamahayag.
Sa laing bahin, ang Nordeco nakigtambayayong sa City Government sa Samal aron mangita og dugang standby/reserve power supply aron matubag ang nagkataas nga load sa Igacos uban sa pasalig sa pagseguro sa usa ka long-term nga estratehiya sa paghatag og usa ka lig-on ug malungtarong suplay sa kuryente sa Isla sa Samal.
Tubag sab kini sa pasalig sa Nordeco atol sa committee hearing sa Senado, butang nga nagpasalig si Senator Christopher Lawrence "Bong" Go sa katawhan sa probinsiya sa Davao del Norte nga sundan gayod niini ang saad sa Nordeco.
Si Go mao ang senate vice chairman sa Blue Ribbon Committee ug miyembro sa committee on energy sa Senado.
"Tinanong ko sila, so sinabi nila, yung problema sa Samal Island, ingon nila by June naa na sila'y solusyon," tipik sa giingon ni Go didto sa Davao del Norte Sports and Tourism Complex sa Tagum City, Hunyo 13, 2023.