Crime index sa Barili mius-os

Nanghinaot ang Kagamhanan sa lungsod sa Barili nga pinaagi sa pakigtambayayong sa mga residente sa lungsod makab-ot niini ang mas ubos nga index crime rating sa lugar.

Kini human nga nakita ang pag-ubos sa crime rate sa lungsod atol sa labing ulahi nga Joint Municipal Peace and Order Council meeting sa lungsod, diin nasayran nga mius-os sa 18 nga rating ang index crime rate niini gikan sa 21.

Samtang niubos usab ang crime rate niini sa 14.22% gikan Enero ngadto sa Hunyo 2023.

Sa padayong drug clearing operations batok sa ilegal nga drugas, ang lungsod nakatala na usab og 27 ka mga drug-cleared barangay.

Moabot sa 15 ka mga lugar ang wala pa nadeklarar nga drug-cleared apan upat na niini ang padayong gisusi ug gimonitor isip kandidato sa drug-cleared barangay.

Subay sa gihimong mga Community-Based Treatment programs, gilauman nga matapos na ang ika-pito ug ika-walo’ng batch. Laing batch na usab ang mosunod sa pagsugod na sa enrollment sa Hunyo 25, 2023.

Nagtuo si Barili Mayor John-John Garcia nga dili kini nila makab-ot kon dili usab sa paningkamot ug pakigtambayayong sa mga lumolupyo sa lugar.