Gipaboran sa Third Division sa Supreme Court (SC) ang hukom sa Court of Appeals (CA) nga misuporta sa mando sa Commission on Higher Education (CHED) alang sa pagpasira sa Mandaue City College (MCC) nga gidumala ni Dr. Paulus Mariae Cañete nga nahimutang sa H. Abellana St., Barangay Basak sa usa ka resolusyon nga gi-upload online sa Hunyo 20, 2023.
Giila niini ang MCC-Cañete nga usa ka “rogue school” ug ang MCC nga naa sulod sa Mandaue City Sports and Cultural Complex sa Barangay Centro maoy giorganisar isip lokal nga kolehiyo sa siyudad ubos sa Section 1 sa MCC ordinance nga gidumala sa MCC Board uban si Mandaue City Mayor Jonas isip Chairperson.
Matod pa, kombinsido ang Korte Suprema nga wala nasayop ang CA sa pagsuporta sa kabalido sa closure order ug notice sa CHED.
Gisalikay usab sa SC Sixth Division ang pag-apelar ni Cañete sa 2016 Quezon City Regional Trial Court (RTC) Branch 216 ruling, diin nagpamatuod usab sa mga mando sa CHED.
Ang SunStar Cebu ug Superbalita Cebu nisuway sa pagkontak sa kampo ni Cañete alang sa mga komento bahin sa maong butang apan wala kini molampos.
Si Cañete kanhi presidente sa MCC nga unang natukod niadtong 2005 sa panahon sa kanhi administrasyon ni anhing Mayor Thadeo Ouano.
Apan, sumala sa mga napatik nga taho, mitumaw ang kaguliyang sa lokal nga kolehiyo dihang nausab ang liderato sa dakbayan nga ubos na ni kasamtangang Mayor Jones Cortes.
Gimanduan siya sa MCC board of trustees (BOT) sa pagkanaog sa katungdanan niadtong Hunyo 2007 ug gipulihan ni Dr. Susana Cabahug isip officer-in-charge o caretaker niini, hinungdan nga nitukmod siya sa pagtukod sa iyang tunghaan subay sa ngalan sa institusyon.
Niadtong 2008, si Cortes nisang-at og supak sa balaod nga appointment ug malversation of public funds nga reklamo batok kang Cañete sa Office of the Ombudsman-Visayas tungod sa giingong pag-hire og lima ka tawo nga wala pay usa ka tuig human sila midagan sa katungdanan sa publiko ug napildi, nakalapas sa mga probisyon sa Local Government Code ug nga giingong nagdumili sa pag-turn over sa MCC funds passbook ug tuition fee sa dihang siya pa ang pangulo sa tunghaan.
Niadtong Disyembre 3, 2010, gipagawas sa CHED ang closure order alang sa MCC-Cañete tungod sa kapakyas niini sa pagtuman sa mga kinahanglanon, ug hapit usa ka tuig pagkahuman niadtong Hulyo 4, 2011, gipagawas usab sa ahensya ang usa ka pahibalo sa publiko nga nagtambag sa mga estudyante sa MCC-Cañete nga mobalhin sa mga lehitimong institusyon.
Apan niadtong 2019, gisupak ni Cañete ang kamandoan sa CHED ug nipadayon sa operasyon sa tunghaan. (HIC, RRM)