Kapulisan sa probinsya sa Sugbo andam na sa paghatag sa hugot nga seguridad sa Barangay ug Sanguniang Kabataan Elections (BSKE) sa Oktubre 30 ning tuiga.
Matod ni Police Colonel Rommel Ochave, pangulo sa Cebu Police Provincial Office (CPPO), nga duna na silay nga contingency plans nga gihimo sama sa pag butang og mga police personnel sa polling precincts ug pagpatrolya sa kabarangayan samtang nagkaduol na ang piniliay.
Gani karon pa lang makita na ang presensya sa kapulisan sa palibot sa matag lungsod ug siyudad sa lalawigan sa Sugbo aron masiguro ang kaluwasan sa mga Sugbuanon.
Usa sa ilang tahas mao ang pagbungkag sa mga private armed group kun PAGS apan gibutyag ni Ochave nga wala sila maka-monitor nga dunay armadong mga grupo nga mahimong magamit sa eleksiyon sa Oktubre.
Apan usa sa ilang gipanggukod karon mao ang mga kriminal nga dunay gipangtagoan nga mga armas nga posibling gamiton unya sa pagpangampanya sa mga kandidato.
“As of now based sa ating validation, wala pa yung mga private armed groups or armed groups na pweding gamitin nung mga kandidato but continuous yung ating info gathering together with our counterpart sa AFP and other branch of government para masiguro na tahimik yung election,” matod ni Ochave.
Sa 1,202 ka barangay sa lalawigan sa Sugbo, wala pay na-monitor ang kapulisan nga kagubot subay sa dagan sa pulitika apan nagpadayon karon ang ilang validation pinaagi sa pag-backtrack sa mga insidente sa milabay nga piniliay.