Sa labing unang higayon, nakatilaw na og kadaugan ang Gilas Pilipinas men’s squad sa ilang pag-asdang sa Europe batok sa Ukrainian under-20 team, 70-61, niadtong Sabado sa gabii, Hulyo 1, 2023 (PH time), sa Kaunas, Lithuania.
Ang kadaugan gipangulohan nila ni Rhenz Abando, June Mar Fajardo, Kiefer Ravena, Dwight Ramos ug naturalized Justin Brownlee.
Ang Gilas Pilipinas, nga nasugamak sa kapildhan sa nag-una nilang duha ka tune-up games batok sa Estonia ug Finland, mao ang nagkontrolar hapit sa kinatibuk-ang duwa batok sa Ukrainians.
Taliwala sa kadaugan, si Gilas Pilipinas coach Chot Reyes wala nakuntento sa gipakitang duwa sa iyang mga batos.
“I was very pleased with how quickly we picked up the new things that we worked on yesterday in practice. But to be very honest, although we won this game, I still think there were a lot of defensive lapses,” matod ni Reyes nga napatik sa spin.ph.
Nagkanayon si Reyes nga sa iyang tan-aw, mao kini ang labing bati nilang duwa sukad sa ilang pagbiyahe sa Europe.
“And If I were to rate it, I think this is the worst game that we played since the start. I know this is the game that we won, but I thought that there was a lot more to be desired.” dugang ni Reyes.
Hinuon, gipasabot ni Reyes nga apektado ang ilang duwa gumikan kay wala ang ilang duha ka pambatong pointguards nga sila si Scottie Thompson ug Chris Newsome, kinsa pulos adunay angol.
“But of course, we came in without our top two point guards so it was kind of understandable,” pasabot ni Reyes.
“But still, in our overall journey in the process, we focused on cutting down on our turnovers, not giving up offensive rebounds, and then being able to execute the defense that we worked on. I thought that we were able to do that.”
Ang pag-asdang sa Gilas Pilipinas tipik sa ilang preparasyon alang sa umaabot nga 2023 FIBA Basketball World Cup diin co-host ang Pilipinas kauban ang Japan ug Indonesia. (ESL)