Gikan sa sinugdanan hangtod sa katapusan, kanunay nga niataki si Regie “Filipino Phenom” Suganob apan pakyas siyang mailog ang korona ni International Boxing Federation (IBF) light flyweight champion Sivenathi Nontshinga ning Lunes sa kaadlawon, Hulyo 3, 2023 (PH time) sa East London International Convention Centre sa South Africa.
Human sa 12 ka rounds, si Suganob, kinsa sakop sa PMI Bohol Boxing, nalubong og maayo sa scorecards sa tulo ka judges, 116-111, 116-111, ug 117-110, nga gikahibulong sa iyang kampo.
Sa 1st round pa lang, niataki na si Suganob apan nataymingan kini og right counter ni Nontshinga nga maoy nagpatumba sa lumad nga taga Dauis, Bohol. Nakabarog ra dayon si Suganob ug padayon kining miataki.
Nahuman ang away nga mao ra ang dagan sa estorya: agresibo si Suganob unya sukol-dagan si Nontshinga.
“We are sad but we are motivated to be better. I know they will meet again because both fighters are young,” mensahe sa manager ni Suganob nga si Floriezyl Podot. “Our team is shocked about the scoring. As what predicted Nontshinga will always run.”
Si Nontshinga nisaka sa 12-0, 9KOs nga rekord samtang si Suganob nahagbong sa 13-1, 4KOs nga baraha. (ESL)