Giusban pagpukan sa Gilas Pilipinas ang Ukraine under-20 squad, 84-74, ning Dominggo sa gabii, Hulyo 2, 2023 (PH time), sa Zalgiris Arena sa Kaunas, Lithuania.
Ning higayuna, ang Gilas Pilipinas nakadawat na og pagdayeg gikan ni coach Chot Reyes sukwahi sa premiro nilang kadaugan sa samang kontra, 70-61, nga gihulagway ni Reyes nga labing ngil-ad nga duwa sa PH national team sukad sa ilang pag-asdang sa Europe.
Ang mga Pinoy nitali og 53.8 percent shooting clip ug nakaposte kini og 13-4 nga bintaha sa fastbreak points.
Gipangulohan ni naturalized Justin Brownlee ang kadaugan pinaagi sa iyang 21 puntos lakip na niini ang tulo ka three-pointers.
Ningtampo og siyam ka puntos matag usa sila si June Mar Fajardo ug Dwight Ramos alang sa Gilas.
Nagkanayon si Reyes nga gumikan kay napamilyar na nila og gamay ang duwa sa Ukraine, hayan nakapangandam sila sa angayan nilang buhaton.
“We were able to defend their favorite sets a little better because we knew already what was coming,” matod ni Reyes sa interbyu sa One Sports.
“We were able to work on it in the shoot around this morning and we were able to pin point the guys who we would stop.”
Adunay mga higayon nga ang batan-ong puwersa sa Ukraine nakapanghudlat sa mga Pinoy gumikan kay nanulod ang ilang mga itsa sa three-point area dili sama sa premirong duwa.
“Credit to Ukraine because they came out and they played much better because they knew us as well,” dugang ni Reyes.
“Yesterday (Sabado) they did not shoot as well from the three-point line. But every game is a learning experience for us as we continuously move forward.”
Mosagubang pa og duha ka tuneup games ang Gilas Pilipinas ning ilang pag-asdang sa Lithuania.
Ang biyahe sa Gilas Pilipinas sa Europe tipik sa ilang preparasyon alang sa umaabot nga 2023 FIBA Baskeball World Cup. (ESL)